Xon de la Campa gana’l XV Alfonso Iglesias de cómic con una aventura de detectives

El comisariu Hevia protagoniza ‘Misteriu nel soterrañu’, obra de Xon de la Campa que resultó escoyida como ganadora del XV Premiu Alfonso Iglesias de cómic. Con una portada que recuerda a les de Tintín, ta ambientada nel París de lo último del sieglu XIX y rescampla pola “correición llingüística y la naturalidá de la llingua escrita”.

Como ye vezu, ésti ye’l primer de los ocho Premios Lliterarios que se fallen nesti 2023. El direutor xeneral de Política Llingüística, Antón García, presidió’l xuráu que conformaron la filóloga Claudia Elena Menéndez y la llibrera especializada en cómic María Fente, con Lourdes Álvarez, filóloga de la direición xeneral, faciendo’l llabor de secretaria.

Ente tolos trabayos presentaos decidiéronse por ‘Misteriu nel soterrañu’, del que valoraron “la corrección llingüística y la naturalidá de la llingua escrita que nun suel ser fácil de consiguir nesta modalidá lliteraria”, que, apunten, sí llogra’l dibuxante xixonés nesta historia resuelta en llinia clara. Ye un episodiu concretu d’un personaxe abiertu a más trames, el comisariu Hevia, como rescampla na parte superior de la portada na qu’apaez el protagonista y dos íconos de la ciudá de París, la estatuta de la llibertá y la torre Eiffel: ‘Les aventures del comisariu Hevia’.

Nacíu en Xixón nel 1973, De la Campa ye ilustrador diplomáu en Grabáu y Técniques d’Estampación pola Escuela d’Arte d’Uviéu. Ente los sos trabayos cuéntense ilustraciones y portaes de llibros y cómics como ‘La Celestina’, ‘Drácula’, ‘Conan el Bárbaru’, ‘El gran llibru de la Mitoloxía asturiana’, ‘1809. Cartes de la revolución de Trubia’ o ‘Llazarín de Tormes’, amás de tires en publicaciones periódiques como ‘La Información del Bajo Nalón’ o ‘La Voz del Trubia’.

Nestos momentos tien en preventa la so primer novela, ‘La bastarda de Pelayu’, que va asoleyar Radagast. “Guerrera, negra, asturiana, bruxa y bastarda. Ésta ye la hestoria de Flavia, la fía illexítima del Rei Pelayu que punxo de rodiyes a una nación y llevantó a otra”, resume la editorial.

Los siete restantes

El Premiu Alfonso Iglesias de cómic tien una recompensa de 6.000 euros, amás de la so espublización. Les otres siete categoríes de los Premios Lliterarios convocaos esti 2023 son novela (XLIV Premiu Xosefa Xovellanos), poesía (XXIX Premiu Xuan María Acebal), ensayu (XXIX Premiu Máximo Fuertes Acevedo), lliteratura infantil y xuvenil (XVI Premiu María Josefa Canellada), traducción (III Premiu Florina Elías) y testos teatrales (I Premiu Pachín de Melás), completándose col destináu a menores de 31 años, el de narrativa moza (III Premiu Enriqueta González Rubin).