Xosé Anxelu Gutiérrez gana tamién el María Josefa Canellada de los Premios Lliterarios 2023

L’avilesín Xosé Anxelu Gutiérrez Morán conviértese na segunda persona en ganar dos de los Premios Lliterarios nun mesmu añu, fechu que namái algamara Berta Piñán na convocatoria del 2017. Depués de llevar el XXIX Premiu Xuan María Acebal de poesía con 'Les hores de lluz', fíxose tamién merecedor del XVI Premiu María Josefa Canellada de lliteratura infantil y xuvenil con ‘Contando colos deos’.

Cabranes, la Casa Conceyu en Santolaya, acoyó ayeri un añu más l’aconceyamientu del xuráu del gallardón, el primeru que preside Antón García como direutor xeneral d’Aición Cultural y Normalización Llingüística. Ésti tuvo formáu pol alcalde, Gerardo Fabián; Alonso Zamora Canellada, fíu de María Josefa Canellada; la escritora Alba Carballo; la profesora y música Marina Pangua; Blanca Fernández, ganadora de la edición anterior con ‘El cartafueyu d’Alquimia’; y Laura Marcos, filóloga de la Viceconseyería de Cultura, Política Llingüística y Deporte, que fixo’l llabor de secretaria.

Ente los 13 trabayos presentaos esta edición decidiéronse por ‘Contando colos deos’, “una obra qu'enllaza cola tradición oral, fai posible l'intercambiu ente los adultos y la infancia, tien un altu valor pedagóxicu y usa una llingua rica y curiada”. El so autor resultó ser Gutiérrez, qu’en xunetu yá ganara’l XXIX Premiu Xuan María Acebal de poesía con ‘Les hores de lluz’.

D’esta forma l’avilesín del 1969, doctor en Bioloxía pola Universidá d'Uviéu y profesor d'investigación del Centru Oceanográficu de Xixón, conviértese na segunda persona en consiguir dos de los Premios Lliterarios nun mesmu añu. Enantes, nel 2017, fixéralo Piñán al merecer el X Premiu María Xosefa Canellada con ‘Vida nel campu’ y el XXXVIII Premiu Xosefa Xovellanos de novela con ‘Como la muda al sol d’una llagartesa’.

Trés gallardones por fallase

Col fallu del Xosefa Xovellanos, yá se conocen los ganadores de cinco de los ocho Premios Lliterarios convocaos esti añu pola viceconseyería de Cultura, Política Llingüística y Deporte. Fallárense enantes el XV Premiu Alfonso Iglesias de cómic, que foi pa Xon de la Campa por ‘Misteriu nel soterrañu’; el XIX Premiu Xuan María Acebal de poesía, pa Xosé Anxelu Gutiérrez Morán por ‘Les hores de lluz’; el XXIX Premiu Máximo Fuertes Acevedo d’ensayu, pa Héctor Braga por ‘Nel cantu la memoria. Ensayu sobro l’asturianada tradicional’; y el XLIV Xosefa Xovellanos de novela, pa Xulio Vixil por ‘Miel amargo’.

Quedaríen por conocer los autores que van llevar el III Premiu Florina Alías a la meyor traducción, el III Premiu Enriqueta González Rubín de narrativa moza y el I Premiu Pachín de Melás de testos teatrales. Éstos trés son los más nuevos, creaos toos nesta llexislatura.