El Congresu toma en consideración la proposición que permite l'usu de les llingües del Estáu na Cámara

Nin l'asturianu nin l'aragonés pudieron sentise na primer sesión, na que s'aprobó tamién que la tramitación se faiga en llectura única, con votación final esti xueves.

PP, VOX y UPN quedaron sólos votando en contra de la proposición de reforma del Reglamentu del Congresu que permita l'usu de les llingües oficiales con interpretación simultánea que presenten el PSOE, Sumar, ERC, EH Bildu, BNG y EAJ-PNV. Nun apaez nel testu los casos del asturianu y del aragonés, ensin reconocimientu oficial pero sí xurídicu nos sos estatutos, pero la Mesa del Congresu dio'l preste a que se puedan usar na Cámara Baxa, anque con autotraducción nel mesmu tiempu d'intervención, lo que limita la so actividá parllamentaria.

Depués del debate parllamentariu, nel que nun intervieno nengún diputáu o diputada asturianu, polo que nun se sintió la llingua asturiana –sí'l gallegu, catalán y eusquera–, entamóse la votación, na que ganó'l 'sí' por 176 votos a 169, con 2 astenciones –una diputada socialista y l'asturianu Rafael Cofiño, de Sumar, seguramente por equivocación– y 3 ausencies. Darréu tratóse la tramitación direuta y en llectura única, lo que permite que nun tenga que dir a Comisión de Reglamentu, entá nun formada, y allargar la so aprobación definitiva, que tamién salió alantre con 179 apoyos, 171 'non' y nenguna astención nin ausencia.

Los diferentes grupos van poder presentar enmiendes a la propuesta, que se va votar el xueves, hasta mañana. Ésta necesita mayoría absoluta p'aprobase.