“Esti pasu adquier una trescendencia especial p’asturianos y aragoneses”, rescampla Aizpurua

El gallegu foi la primer llingua diferente al castellanu n’emplegase con normalidá y ser tornada de forma simultánea nel Congresu. Foi’l diputáu socialista José Ramón Gómez Besteiro na presentación de la proposición de reforma del Reglamentu, sesión con referencies úniques al asturianu de Marta Irene Lois, de Sumar, y de Mertxe Aizpurua, d’EH Bildu, que dedicó unes pallabres de sofitu a asturianos y aragones, pa los que “esti pasu adquier una trescendencia especial”.

Celebróse nel Congresu la toma en consideración de la proposición de reforma del Reglamentu que permita l’usu de les llingües del Estáu na Cámara. Una sesión na que yá se ta permitiendo usar los diferentes idiomes al castellanu, les oficiales con traducción simultánea, y l’asturianu y l’aragonés cola necesidá de que les diputaes y diputaos que quieran emplegala tengan qu’autotraducise nel mesmu tiempu d’intervención, esto ye, repetir les sos pallabres n’español, lo que va limitar la so actividá parllamentaria.

El primeru n’intervenir y en facer usu del so idioma con normalidá, foi’l socialista Besteiro, unes pallabres que provocó la salida de VOX del hemiciclu en mou de protesta, dexando los auriculares nel escañu del presidente Pedro Sánchez, güei ausente. Tamién lo fixo depués la so paisana Lois, qu’apuntó que, “dende Sumar, que somos un grupu plurinacional que fala catalán, eusquera, galego…, que fala aragonés, asturianu…, que fala español. Consideramos que güei ye un día importante, un día históricu. Sicasí lo que vamos aprobar güei na Cámara ye una midida de sentíu común”.

L’idioma catalán sintióse per primer vegada de boca de Gabriel Rufián, d’ERC, y el vascu, d’Aizpurua, diputada d’EH Bildu que mencionó al asturianu y aragonés en tou momentu al referise a les llingües del Estáu y que quixo mandar unes pallabres de sofitu a los sos falantes. “Quiero alcordame de dos comunidaes pa les que güei esti pasu adquier una trescendencia especial, asturianos y aragoneses. La llexislatura anterior fuimos quien a axuntar fuercies por toles llingües, tamién les vuestres. Sinceramente, allegrámonos, y amosamos tol nuesu respetu y apoyu hacia les vuestres llingües qu’entá nun tienen la oficialidá necesaria. Sabemos que nun va ser fácil algamalo, pero tamos segures de que lo consiguiréis y vamos tar nesi camín”, espresó.

Posteriormente, l'arxentín residente en Catalunya de Sumar, Gerado Pisarello, fixo un comentariu en réplica a la intervención del popular Borja Sémper, na que recordaba como toles llingües, citando tamién al asturianu y al aragonés, sonaren nel pasáu nel Congresu ensin protesta del PP y VOX.