Les III Xornaes del Vigulín Tradicional de L'Infiestu treslladen la mayor parte de l’actividá a La Benéfica

L’Infiestu acueye un añu más unes yá consolidaes Xornaes del Vigulín Tradicional. Esta iniciativa de LaKadarma pa reivindicar esti instrumentu de tradición incorpora La Benéfica, l’espaciu cultural recuperáu pal pueblu, como sede de gran parte d’actividaes, ente elles el conciertu del sábadu d’Alicornio y Llan de Cubel.

Esta tarde va arrancar l’actividá na propia La Benéfica, que sustitúi a la sala polivalente y la Piscifactoría como allugamientos principales, a les 18 hores cola presentación y conferencia ‘Estudiando la música popular del siglo XVII: el Manuscrito de Salamanca’ d’Ana Lombardía, pa siguir, a les 20 hores, col siempre esperáu Alcuentru del Vigulín Asturianu. L’actividá va continuar de nueche en La Traviasa, dende les 22 hores, con una sesión vigulinera.

El Prial va acoyer mañana, de 10 a 18.30 hores, el cursu ‘El vigulín nel folk asturianu’. Al empar en La Benéfica va haber actividaes pa la reciella: al meudía Fernando Valle Roso y Silvia Moreno van poner el so espectáculu ‘Cantares de y pa neñes y neños’ y a les 17.30 hores Sergio Buelga va presentar les Olimpiaes Asturianes.

Una Nueche Vigulinera va poner el ramu a l’actividá del sábadu. Primero van xubir al escenariu los castellanos Alicornio (22 hores), pa depués dar pasu a los históricos Llan de Cubel (23.30 hores).

Animación pel pueblu y Vermú en Danza

Los Gascones van encargase d’animar L’Infiestu’l domingu dende’l meudía. Na xornada última de les III Xornaes del Vigulín Tradicional, coordinaes por Rodrigo Joglar, tamién va haber espaciu pa un taller de baille tradicional con Santi Galgera y un Vermú en Danza.

Al empar, dellos restoranes del conceyu ufren mañana y el domingu un Menú Vigulineru, en concreto L'Estanku y Los Llantares de Pelayo, en L'Infiestu; Palacete Real, en Villamayor; y Bar Pili, en Miyares. Tamién collaboren coles xornaes El Formigueru, Café Denver y El Fresh.

Na semeya, una pancarta en L'Infiestu anuncia la celebración d'esta fin de selmana.