“Les xornaes busquen reivindicar la identidá del vigulín como instrumentu de tradición y xuntase”, espresa Rodrigo Joglar

Esta fin de selmana apuerten les II Xornaes del Vigulín Tradicional con una programación más ambiciosa depués del ésitu del añu pasáu. Una charra, cursos, actuaciones y animación de cai van allegrar L’Infiestu por mor d’esta iniciativa que busca “reivindicar la identidá del vigulín como instrumentu de tradición”, afirma’l coordinador Rodrigo Joglar, que rescampla “l’espíritu de xuntanza ente músicos” col que nació.

“Vamos caltener el mesmu formatu que l’añu pasáu, con un parte pedagóxica, otra divulgativa y llueu les actuaciones”, esplica. Xosé Antón Fernández ‘Ambás’ y Ramsés Ilesias van poner la conferencia inaugural de les xornaes el vienres a les 17.30 hores na Sala Polivalente, de títulu ‘El vigulín nes investigaciones del Archivu de la Tradición Oral d’Ambás (ATOAM), pa siguir, sobres les 19.30 hores, cola II Xuntanza de Vigulineros Asturianos, y finar con una folixa en La Traviesa.

El sábadu a les 10 hores n’El Prial va arrancar el cursu ‘El vigulín pal baille tradicional asturianu: repertoriu y recursos estilísticos’ impartíu por Dolfu R. Fernández (nivel d’ainiciu), Rubén Bada (avanzáu) y Santi Galguera (baille tradicional), con una importante demanda. Va allargase hasta les 14 hores, pa siguir de tarde de 16.30 a 18.30 hores.

L’animación de cai va ponela La Banda… Latira! dende’l meudía –tamién el domingu–. El sábadu de tarde tamién va percorrer L’Infiestu una pareya de vigulín y bombu de xeitu tradicional, tan habituales nel pasáu nesta zona del país.

Otra de les novedaes d’esta edición son les actividaes pa la reciella. La primera va tener llugar el sábadu a les 18 hores, el taller ‘Restolando’ de David Varela qu’avera a los pequeños los instrumentos tradicionales, mentes que pal domingu, a les 17.30 hores na Piscifactoria, va ponese’l cuentu musical, pa neñes y neños de 3 a 8 años, ‘El vigulín de Ramonín’ d’África Domínguez.

Rodrigo Martínez y Calea

La Piscifactoría tamién va acoyer les actuaciones y la folixa nocherniega del sábadu. El lleonés Rodrigo Martínez, integrante de Tarna, va abrir la Nueche Vigulinera con un conciertu en formatu tríu, pa siguir col grupu Calea, formáu por Leticia Baselgas, Silvia Quesada y Rubén Bada, encargándose d’allargar la celebración DJ Fañagüeta.

El domingu al meudía, nesi mesmu llugar, Galguera va poner un taller de baille tradicional pa depués entamar un Vermú en Danza. Mentes, los chigres de L’Infiestu van ufrir estos díes un pinchu vigulineru pa celebrar unes xornaes que tienen práuticamente enllenos los agospios de la población pa la nueche del sábadu, y van esponese los paneles de la muestra del añu pasáu nun escaparate de la cai Cuadonga.

“Si la previsión nun falla, la xente ta mui animao pa esta segunda edición. L’añu pasáu salió too mui bien organizativamente y la participación foi mui bona”, espresa Joglar, que coordina estes xornaes entamaes pola Banda Gaites LaKadarma cola collaboración del Conceyu de Piloña y la participación de dellos coleutivos y asociaciones. “Nesta ocasión ampliamos actividaes y zones y tamos un poco a la espeutativa, porque la xente va repartise más, pero esperamos que salga too igual de bien”, añade.

Coles Xornaes del Vigulín Tradicional los sos promotores busquen “reivindicar la identidá d’instrumentu de tradición na mísica asturiana y promover esi espíritu de xuntanza ente músicos, vese les cares, tocar… Ser un momentu d’alcuentru ente’l gremiu de músicos”, rescampla Joglar. Asina, recuerda la importancia del vigulín na zona, magar la idea xeneralizada de la xente del llugar de la gaita como principal referente musical, “enraigonáu con instrumentos más antiguos como bandurries y cuerdes mediavales a los que dio continuidá. Considérase un instrumentu de segunda categoría o como foriatu, que vieno dende’l folk, cuando tuvo equí siempre”.

Na semeya, primer Xuntanza de Vigulineros Asturianos celebrada l'añu pasáu.