"Nin a historia nin a cultura nin, por suposto, as llinguas, son cautivas d’ideoloxía ningúa", afirma Barbón

El presidente emplegó les trés llingües falaes nel país nel so discursu nel actu d'entrega de les Medayes d'Asturies, dando nesta ocasión más pesu al asturianu na so intervención.

El 8 Setiembre Adrián Barbón, nuna cita na que la llingua asturiana taba reconocida cola presencia de Xosé Lluis García Arias como gallardonáu, fixo usu del gallego-asturiano na parte que tocó'l tema cultural y llingüísticu. "Tamén podemos tar d’acordo noutra certeza", arrancó enllazando cola primer parte del discursu, "que el aprecio á nosa historia y á nosa cultura fortalece Asturias".

"Nin a historia nin a cultura nin, por suposto, as llinguas, son cautivas d’ideoloxía ningúa", siguió nel Auditoriu d'Uviéu'l presidente, qu'apuntó que "pasaron 42 anos dende qu’entróu en vigor el noso Estatuto d’Autonomía. É pouco máis novo qu’a constitución de 1978, que reivindico como pacto de convivencia y marco llegal necesario, fruto d’úa Transición impulsada precisamente pola disposición al consenso. Enxamás entendín por qué a protección, el uso y a promoción del asturiano, verbos que xa vein expresaos nel artículo cuarto d’ese Estatuto aprobao en 1981, tein qu’entenderse como úa llinia fronteiriza entre dereta y esquerda. Esa concepción divisoria del asturiano y del eonaviego, as nosas llinguas propias, nun ten sentido ningún y é, dafeito, úa incongruencia histórica. Nun entendo por qué quen s’espresa ou escribe en fala ten que ser etiquetao ideolóxicamente".

Nesti puntu quixo dexar claro que "nun tou referíndome á oficialidá. Xa conocen ustedes a mía opinión y a del meu goberno sobre ese asunto. Tou falando da necesidá de desterrar cualquer sentimento d’inferioridá sobre a nosa historia, sobre a nosa cultura y a nosa identidá. Xa é el hora de darye dúas voltas á chave que zarre ese complexo que nun deixa realzar el valor cultural y a importancia del asturiano y del eonaviego".

"Asturies, lo primero"

Depués de tornar al castellanu, el socialista cambió al asturianu, qu'emplegó nuna amplia parte de la so intervención, inclusive pa referise a los representantes de les cámares de les Cortes españoles y del Gobiernu estatal presentes: "Y como güei nos acompañen la presidenta del Congresu, Francina Armengol; el presidente del Senáu, Pedro Rollán; y el ministru de Sanidá, José Manuel Miñones, atrévome a garralos de testigos", dixo.

"Tamos en vísperes de que s’esclarie la investidura del próximu presidente del Gobiernu d’España. Sería un hipócrita si diere a entender que nun me da más por cómo acabe. Como cuando me referí a la oficialidá, toles persones d’esti auditoriu saben qué ye lo que yo prefiero. Pero’l mio compromisu ye otru. Son tres palabres bien cencielles: Asturies, lo primero. Pa mí y pal mio gobiernu, la defensa de los intereses de los asturianos y les asturianes, l’atención y la solución de los problemas de la nuestra tierra, siempre van tar per delantre de cualquier otra cuestión. Ye un mensaxe directu, ensin doblez nin suxetu a interpretaciones, pa que s’entienda a les clares", apuntó a continuación.

Referíase a una quinta "certeza" que se xuntaba a cuatro previes –"el valor del diálogu, la importancia de la cultura propia, la confianza nes nuestres fuercies y la seguridá de qu’entamamos otra etapa na nuestra historia–. "Yá podía desbloquiase pronto la situación nacional porque nin España nin el Principáu tienen tiempu que perder. En cualquier casu, seya cual seya’l resultáu, el mio Executivu siempre va tener el mesmu norte: con tola llealtá y cola mayor esixencia, Asturies, lo primero", finó esta parte de la so intervención n'asturianu.

Na parte última del discursu refirióse a los gallardonaos rescamplando los exemplos "de la dedicación sabia, humanista y cordial de Luis Fernández-Vega; del reconocimiento histórico de la mujer de María Teresa Álvarez; de la entrega humanitaria, auténtica marca Asturias de solidaridad internacional, que representa José Andrés; de la condición pionera en la política y las instituciones de Laura González, siempre coherente, humilde y leal; o de la perseverancia en el estudio y el conocimiento de Xosé Lluis García Arias para que el asturiano sea apreciado con la dignidad cultural que merece". Tamién de "la generosidad empresarial y cultural de Antonio Suárez; la reparación de la memoria del rector Leopoldo Alas; el ejemplo vital de compromiso y reconciliación que encarna mi querida Maricuela; o esa asturianía de alma que representa Juan Ramón Lucas", calificando a toos elles como "las grandes enseñanzas de este acto".

Y de despidida, unos versos de la viceconseyera de Cultura, Política Llingüística y Deporte, Ana Vanessa Gutiérrez: "Si la patria ye un temblor, / tu yes munches, / munches veces, / patria mía".

Na semeya, Fernández Vega; García Arias; Suárez; González; Barbón; Álvarez; Ana Cristina Tolívar Alas, nieta del rector; y Lucas.