Sigue aumentando’l númberu d’empreses qu’empleguen l’asturianu qu’agospia’l puestu d’Iniciativa na FIDMA

Un añu más el puestu d’Iniciativa pol Asturianu na Feria Internacional de Muestres d’Asturies (FIDMA) ve como aumenta’l númberu d’empreses qu’agospia pa que presenten los sos servicios y productos. Les compañíes formen parte de sectores tan diversos como l’agroalimentariu, editorial, audiovisual, moda, infantil, telefonía, industrial, seguridá y traducción, y usen la llingua asturiana.

El sábadu inaugúrase la sesentena sesta edición d’esta cita del branu xixonés a la qu’acuden centenares de firmes de dientro y fuera d’Asturies pa presentase énte’l públicu asturianu. Un eventu pel que l’añu anterior pasaron 741.014 visitantes, superando’l récor del 2019, y que cuenta con una ocupación del 100 por cientu (722 espositores y 2.200 marques), con empreses que quedaron fuera por falta d’espaciu.

La FIDMA ye, poro, un gran escaparate nel que la llingua asturiana tien un espaciu destacáu nos años últimos gracies al puestu d’Iniciativa pol Asturianu. Amás de dar a conocer el llabor del coleutivu pa cola normalización del idioma, el stand, que repite nel pabellón 3-4 del Palaciu de Congresos, tamién da agospiu a empreses qu’empleguen l’idioma.

Ye’l casu d’Aitrad, Acuto Xuegos, Asturcón Seguridá, Cartonajes VIR, Cuatro Gotes Producciones, Cerveza Caleya, Nordés Telefonía, Puru Remangu, Ediciones Radagast, Ringo Rango, Tiza y Peonza y Ediciones Trabe, que repiten, y Mondo Manzana y Panduru, que s’estrenen nesta ocasión. En total ye una empresa más que nel 2022, 14, cuando aumentó en cuatro, al nun participar nesta ocasión nel puestu d'Iniciativa por Asturianu 9.000 Soluciones.

Con esta collaboración Iniciativa pol Asturianu quier “facer llegar a la ciudadanía que l’asturianu ye un elementu que favorez la creación d’empreses y qu’orixina actividá económica, puestos de trabayu y, polo tanto, riqueza. Amás, con tola variedá de productos y servicios de les empreses, la organización quier amosar que la llingua asturiana puede ser un elementu de diferenciación y qu’aporta un valor añadíu a los productos y servicios qu’ufierten estes empreses”.

Esti espaciu nun ye l'únicu nel Recintu Ferial Luis Adaro onde poder atopar presencia d'empreses qu'empleguen l'asturianu o conteníos nesti idioma, yá que cada vegada ye más habitual que la llingua asturiana tea presente en campañes o nel día a día de firmes comerciales.

Hasta’l domingu 20

La LXVI FIDMA va abrir les sos puertes sábadu hasta’l domingu 20. L’horariu ye de 11 a 22 hores, y la entrada xeneral tien un preciu de 4,5 euros, de 1,5 pa neñes y neños d’ente 4 y 12 años.

Na semeya, visitantes al puestu d'Iniciativa pol Asturianu na edición pasada de la FIDMA.