Una cita del llibru 'Nunca vencida', nel Plenu d'Investidura

El candidatu Adrián Barbón lleó unes frases del ensayu de David Guardado nel momentu de falar de la reforma del Estatutu d'Autonomía.

El llibru ‘Nunca vencida. Una historia de la idea d’Asturies’ (La Fabriquina), obra del fundador d'Asturies.com xunto Fernando de la Fuente, colóse nel discursu de la primer sesión del Plenu d'Investidura na Xunta Xeneral. Foi na parte na que'l socialista, emplegando la llingua asturiana, apuntó que "sigo defendiendo la reforma del Estatutu, incluyida una oficialidá consensuada, ensin imposiciones. Pero tampoco quiero dar fuelgu a esperances falses. O hai un cambiu de planteamientos o va ser imposible axuntar los 27 votos qu’esixe la reforma del Estatutu. Los cambios tienen que venir de la derecha”, a lo que siguió señalando que “invito a la moderación, a que se garre exemplu de comunidaes cercanes, como Galicia. Aznar dixo nel so día que falaba catalán na intimidá. Nunca sabremos si yera verdá, lo que sí tengo claro ye que Feijóo fala gallegu en público y nun-y cuesta trabayu nin se pon coloráu por ello”.

Nesi momentu comentó que "aprovecho a esti propósitu unes frases d’un llibru de recién, 'Nunca vencida'. Pido disculpes al autor, David Guardado, por si entiende que la descontestualizo. Al mio entender, enllaza perfectamente colo qu’intento dicir –y, inclusive, col planteamientu xeneral d’esti discursu–: 'Anque sía con cuarenta años de retrasu, ye un bon momentu pa que los asturianos y asturianes nos replanteguemos cuál tien de ser el nuestru futuru como comunidá humana autónoma: qué queremos ser, a qué nun tamos dispuestos yá a renunciar y cómo queremos relleer, adaptándolu al nuestru tiempu, el mitu de la independencia y de la llibertá d’Asturies, de l’Asturies nunca vencida, col que se construyeron a lo llargo de la historia los discursos sobre la nuestra singularidá'".

Continúo'l presidente del país en funciones rescamplando que "la mio defensa del Estáu de les autonomíes, ún de los mayores aciertos de la nuestra Constitución, cuadra con esi razonamientu. Más de cuatro décades depués de l’aprobación del Estatutu, tenemos que pensar el nuestru porvenir como 'demos', como la comunidá política madura que somos. La calidá de les nuestres redes sanitaria, social y educativa, igual qu’un caltenimientu envidiable de la riqueza natural, y son namás dellos exemplos, son inseparables de la existencia d’Asturies como realidá política. A esos efectos, la autonomía yá demostró de sobra la so utilidá. La reforma del Estatutu que propongo diba ayudar a avanzar nel desenvolvimientu institucional, diba ponenos en pie d’igualdá con otres comunidaes y, a un tiempu, diba compensar la deuda histórica coles nuestres llingües. Por esto, el fomentu del arguyu de pertenencia, sobre’l que tanto insistí los últimos años, va siguir siendo ún de los afanes del mio gobiernu. L’apreciu a lo propio ye un valor en cualquier sociedá, y eso pasa en toles partes del mundu pol reconocimientu de la tradición cultural".