El XV Premiu Camaretá al Meyor Cantar recupera los cuatro finalistes pa la gala del Teatru de la Llaboral

El domingu 12 de payares va celebrase la gala del XV Premiu Camaretá al Meyor Cantar, que repite nel xixonés Teatru de la Llaboral y recupera los cuatro finalistes. Nesta ocasión pasaron el corte del xuráu Marisa Valle Roso, Alienda, José Manuel Tejedor y Vero Rubio.

La del 2022 foi la primer ocasión dende la creación del gallardón nel 2007 “cola mira d’afianzar, prestixar y arriquecer la creación musical tanto n’asturianu como en gallego-asturiano” na que namás participaron na final trés formaciones. D’esta forma, torna a la normalidá un gallardón con una recompensa de 6.000 euros que nesta edición tien en cuenta aquellos trabayos asoleyaos l’añu pasáu y nos trés primeros meses del actual.

Na gala de la Llaboral van defender los sos temes Marisa Valle Roso, qu’acude con ‘Tonada’, cantar con lletra de la propia cantante sobre un tema tradicional; Alienda, que presenta ‘Zanca de cabra’, tamién sobre un cantar tradicional y lletra, nesti casu, de Roberto González-Quevedo n'asturianu occidental; el gaiteru José Manuel Tejedor con ‘Les tos nales’, con testu de Gema Fernández y voz de Loreto Suárez (Algaire); y la canguesa Vero Rubio, que presenta tamién una pieza na variante occidental del idioma, ‘Dixo miou padre’. Toos van tener qu’interpretala en direuto pa que’l xuráu, compuestu por especialistes en música y llingua asturiana, decida’l ganador.

Mientres delibera, el públicu presente y el que siga la gala per televisión –TPA ta emitiéndola en direuto nos años últimos–, Algaire, grupo ganador de la edición pasada por ‘Coral y maera’, va dar un conciertín.

Tolos vencedores

La llista de ganadores del Premiu al Meyor Cantar, qu’incorporó nel 2020 el nome ‘Camaretá’ como reconocimientu a esta agrupación cultural y musical, complétenla Toli Morilla, con ‘Azul y gris’ (2007); Herbamora, con ‘Nosh’ (2008); Alfredo González, con ‘La nada y tu’ (2009); Xera, con ‘Tierra’ (2010); Skama la Rede, con ‘Condenáu’ (2011); Asturiana Mining Company, con ‘Si nun conoces Vaḷḷouta’ (2012); Taranus, con ‘Ensin ti’ (2013); la Banda de Gaitas El Trasno, con ‘Volviche’ (2014); Anabel Santiago, con ‘La lloca’ (2016); Luis Núñez y los Folgazanes, con ‘La ñeve y la esmeralda’ (2017); Lafu y Rebeca, con ‘Les sombres de la yerba’ (2019); Rodrigo Cuevas, con ‘Rambalín’ (2020); y Carla Armas y Rubén García, con ‘El que conoz a tierra’ (2021).