Los llibros editaos por Araz, a la venta na Feria del Libro de Xixón

Tán disponibles nel puestu de La Fabriquina dende esti xueves hasta'l domingu.

La séptima edición de la Feria del Libro de Xixón (FeLiX) arrancó esta mañana con un récor nuevu de participación. El paséu de Begoña y la cai Francisco Tomás y Valiente acueyen 70 casetes de llibreríes y editoriales, 13 más que l'añu pasáu, cuando s'instalaron 57.

Va estrenase nesta gran fiesta lliteraria La Fabriquina, un espaciu onde van tar disponibles títulos editaos por Araz, empresa editora tamién d'Asturies.com. Ta asitiáu nel puestu númberu 3, en Francisco Tomás y Valiente, y nél el públicu va poder mercar, ente otres obres y productos, títulos como 'Asturianes', 'Kikirikikí' o '¿Qué te fai falta pa ser un heroe?', d'Alicia Álvarez o los primeros llibros asoleyaos pola empresa como 'Mal de llingües' de Jesús Tuson; 'Dos visiones asturianes de les nueves tecnoloxíes' de Xabiel García Pañeda y Rubén Sánchez Antuña; 'El nacimientu d’una nación. Historia de sudáfrica' de Faustino Zapico; y 'Llingua estándar y normalización llingüística', de David Guardado, autor que ta acabante d'asoleyar con La Fabriquina 'Nunca vencida. Una historia de la idea d'Asturies'.

Otra manera, tán tamién disponibles los últimos exemplares del discu-llibru de Xaime Martínez, yá escosáu, 'Ósculos d’agua nel Imperiu Asturianu’;

Actividaes nes carpes y espacios, y horarios

L'horariu d'apertura de la FeLiX ye de 11 a 14.30 y de 17 a 21.30 hores, de güei al sábadu, y de 11 a 14.30 y de 17 a 20 hores, el domingu. Nes diferentes carpes instalaes en Begoña, asina como nel patiu del Centru de Cultura Antiguu Institutu y la Escuela de Comerciu, entámense estos díes hasta 77 actividaes como alderiques o presentaciones, con presencia de dellos autores en llingua asturiana.