Preséntase na FeLiX el númberu 39 de la revista 'Lliteratura' de l'ALLA

Cuatro escritores van participar nel actu que conduz Xosé Ramón Iglesias Cuevas.

La Feria del Libro de Xixón (FeLiX), que se ta celebrando dende ayeri y hasta'l domingu en Begoña y na cai Francisco Tomás y Valiente, acueye na so programación la presentación del númberu 39 de la revista 'Lliteratura' que dirixe Marta Mori y asoleya l'Academia de la Llingua Asturiana (ALLA). Espublizada con motivu del XLIV Día de les Lletres Asturianes, presenta un diseñu nuevu y como conteníos poesía, narrativa, ensayu, traducción y crítica.

Iglesias Cuevas, secretariu de la institución académica, va conducir un eventu que va contar cola presencia de los autores Gonzalo G. Barreñada, Solinca Turbón, Ánxel Álvarez Llano y Daniel García Granda. Cola puntualidá habitual de la feria xixonesa, l'actu va desenvolvese dende les 11 hores na carpa Atalaya, asitiada nel centru de Begoña.