“La placa que fai alcordanza de Fierro Botas ta a puntu d’acabar d’iguase”, confima Barrero

La Oficina de Normalización Llingüística de Xixón fixo entrega esta mañana de los diplomes conmemorativos a les alumnes y alumnos de Llingua Asturiana y Lliteratura del IES Fernández Vallín que ganaron el VI Premiu Fierro Botas a la Meyor Idea Normalizadora. Miguel Barrero, direutor de la Fundación Municipal de Cultura, Educación y Universidá Popular, aprovechó’l momentu p’anunciar la igua de la placa que recuerda al xesuita nos xardinos que lleven el so nome.

Depués d’anunciar a los presentes que la pizarra dixital pa l’aula d’asturianu que sirve como recompensa d’esta iniciativa destinada a tolos institutos del país “col envís de favorecer el protagonismu activu del alumnáu y la so reflexón y ya implicación nel procesu de normalización llingüística”, amás de recordar la figura de Federico González-Fierro Botas, rescampló que “la placa que fai alcordanza de Fierro Botas ta a punto d’acabar d’iguase”. Ésta ta asitiada nos xardinos que lleven el so nome n’El Natahoyo y recién el Coleutivu Manuel Fernández de Castro, del que foi impulsor y presidente, y Iniciativa pol Asturianu pidieron la so restitución al tar “frañada y en mal estáu de conservación”.

Barrero felicitó tamién nel actu, que tuvo llugar nel patiu del Centru Antiguu Institutu, a les 16 alumnes y alumnos de primeru y segundu de Bachilleratu y cuartu de la ESO que presentaron “un proyeutu mui prestosu”, y aseguro que ye “tan prestosu que vamos facer por que se pueda convertir en realidá”. De nome ‘Atéchate col asturianu’, ésti busca “esparder l’asturianu per aciu de paragües”, esplica la profesora Marián García Rodríguez.

Asina, creáronse “dos llinies de paragües, una pa nenos que se llama ‘Orbayando pallabres’ y otra pa mayores, que sería ‘Lloviendo pallabres’”, un total de “12 paragües con cuatro colores, según les estaciones, que caún lleva ente diez y ocho pallabres que tienen que ver con temátiques que fuimos trabayando en clase: personaxes de la mitoloxía, verbos, xuguetes…”. Voces “que buscamos que nun foran mui enguedeyaes, non por nada, sinón por facer que foren pallabres que te prestara tener nel to paragües”, añadió.

Una cuestión que terminó de convencer al xuráu frente a otros foi que’l proyeutu del Fernández Vallín plantega ónde se pue desenvolver esta campaña normalizadora, amás de tar mui bien estructuráu. La responsable de la Oficina de Normalización Llingüística, María Xosé Rodríguez López, rescampló, pela so parte, “el trabayu qu’hai detrás d’esti proyeutu, que somos consciente que ye duro y ye muncho”, teniendo en cuenta “les poques hores” coles que dispón la materia nos institutos.

Na semeya, un momentu de la intervención de Barrero, con Rodríguez López y García Rodríguez a la so derecha, y dalgunes de les alumnes y alumnos premiaos sentaos nes primeres fileres.