El Coleutivu Manuel Fernández de Castro y Iniciativa reclamen la restitución de la placa n'alcordanza de González-Fierro Botas en Xixón

El reactiváu recién Coleutivu Manuel Fernández de Castro reclama xunto con Iniciativa pol Asturianu la reparación de la placa n’alcordanza de Francisco González-Fierro Botas instalada nel parque al que da nome nel xixonés barriu d'El Natahoyo nel añu 2010. “Alcuéntrase frañada y en mal estáu de conservación”, denuncien.

Les dos organizaciones consideren que la imaxe d’esti homenaxe del conceyu al profesor, escritor y relixosu resulta llamentable y por ello, piden la restitución del distintivu al tar, amás de rotu, “mui puercu” y precisar “una renovación completa”. Amás, dambes asociaciones soliciten el cambéu de la placa col nome del parque pa que tea tamién n’asturianu, pasando a apaecer como ‘Xardinos de Federico Fierro Botas’.

Nacíu n’Uviéu, el xesuita pasó gran parte de la so vida en Xixón pol so llabor na Fundación Revillaxixéu asitiada n’El Natahoyo. González-Fierro Botas foi impulsor y presidente del Coleutivu Manuel Fernández de Castro que trabayó na traducción de testos llitúrxicos y la persona que más puxó pola torna al asturianu de la Biblia, llabor escomanáu que s’allargó per trés décades y que nun pudo ver termináu al finar nel 2002 nun accidente de tráficu na población rusa de Vladivostok.