El VII Premiu y Festival Nel Amaro de teatru va contar con namái trés finalistes

El xuráu del Premiu y Festival Nel Amaro de Teatru Profesional en Llingua Asturiana o Gallego-asturiano escoyó nesta séptima edición del gallardón trés obres finalistes, a diferencia de toles ocasiones anteriores, cuando pasaron el corte cuatro. Repite Carlos Alba, ganador l’añu pasáu con 'Les madreñes vacíes', torna Escenapache y debuta Saltantes Teatro.

L’autor y les dos compañíes van representar les sos propuestes nel mes d’ochobre nel uvieín Teatru Filarmónica na fase de festival del Nel Amaro, funciones con accesu de baldre pal públicu. Nelles el xuráu, conformáu por especialistes en teatru y llingua asturiana, va poder ver en direuto les obres y valorar cuál ye la que merez la recompensa de 6.000 euros.

Alba, ganador de la primer edición con ‘Llázaro de Tormes’ y l’añu pasáu con ‘Les madreñes vacíes’, va pesllar el festival el vienres 27 d'ochobre cola puesta n’escena d’ésta última. Por contra, va ser el primeru de los finalistes en participar, el 6 d’ochobre, con ‘Xuan Soldáu’.

Debuta Saltantes Teatro nesti gallardón con ‘El gorrumbu’ el día 13 y Escenapache, compañía que pasó’l corte nes dos primeres ediciones, ensin fortuna, va intentalo’l 20 con ‘Caperucita en Muniellos’ (sic). Va abrir el festival la representación el 29 de setiembre de ‘La reina la guapura de Leenane’, de Producciones Nun Tris, ganadora del 2021, que se programa pa les 20 hores por tar destinada a un públicu adultu; el restu de funciones van tener llugar a les 18.30 hores.