Silvia Quesada va actuar nel XLIV Día de les Lletres Asturianes

L'Academia de la Llingua Asturiana (ALLA) recupera tamién la espicha en Cualloto.

Depués de dar a conocer ayeri'l cartelu del XLIV Día de les Lletres Asturianes/Día das Lletras Asturianas, la institución anunció esta mañana que l'actuación musical que pieslla tolos años la Xunta Estraordinaria va correr a cargu de Silvia Quesada. La cantante va tar acompañada por Alfredo González y Cristina Gestido.

Una vegada fináu l'actu, previstu pal vienres 5 de mayu a les 19 hores nel uvieín Teatru Campoamor, con entrada llibre después d'años con restricciones d'accesu pola situación sanitaria, los académicos van desplazase a Cualloto pa celebrar la tradicional espicha. Va celebrase nel Llagar Herminio, con un costu de 30 euros, y p'acudir ye necesario avisar previamente col unviíu d'un corréu electrónicu xestion@alladixital.org col nome y los dos apellíos de los asistentes.