Gonzalo G. Barreñada asoleya 'El valle encesu'

Va presentar la novela na Llibrería Trabe.

'El valle encesu' ye'l títulu de la novela nueva de Gonzalo González Barreñada, editada pola propia Trabe: "En Bubiella’l tiempu pasa lentu y chornosu. La xente qu'habita ellí vive la vida porque hai que la vivir, como una condena d’años nun fornu ensin aire nel que nunca nun pasa nada, anque siempres paez a piques de llegar la desgracia y la tensión va medrando col pasar de los díes. Firmu, el fíu d’El Llobu, el curanderu’l valle, vuelve pal pueblu en separándose de la muyer. Ellí va reconociendo les cases y les cais, el paisaxe y recordando a dellos vecinos o conociendo a otros que nunca nun viera", introduz la historia.

Depués d'un añu esitosu, al llevar concursos lliterarios del nivel del Xosefa Xovellanos de novela, el Teodoro Cuesta de poesía y l'Andrés Solar de novela curtia, llega agora esti llibru "con una prosa densa, morosa", na que'l narrador pon "negro sobre blanco la vida n’apariencia cenciella pero enllena de secretos y mentires d’un pueblu, d’una xente que paez movío por filos esternos y ayenos: marionetes de carne y güesu". Mañana, a les 19.30 hores, va presentala n'Uviéu nun actu que va tar conducíu por Rafael Rodríguez Valdes.

Autor de 'La casa de Xuan Buelga', primer novela espublizada, nel 2018, l'escritor sotrondín dio continuidá al mundu míticu de Burgundu col volume de rellatos 'Hestories de Burgundu' (2018) y 'La hestoria ensin contar' (2021). Tien pendiente d'asoleyar 'El viaxe del cacique', col que ganó'l Xosefa Xovellanos, y 'La guerra del Medrosu', merecedora del Andrés Solar, y amás cuenta tamién con producción poética.

Na semeya, exemplares de 'El valle encesu' nel escaparate de la Llibrería Trabe y el cartelu qu'anuncia la presentación.