“L’Andrés Solar ye un premiu que me presta muncho por llevar un nome tan reconocíu na llingua asturiana”, espresa Gonzalo G. Barreñada

‘La guerra del Medrosu’ ye la obra ganadora del II Premiu de Novela Curtia Andrés Solar Santurio. El so autor ye Gonzalo González Barreñada, merecedor tamién nesti 2022 del Xosefa Xovellanos y Teodoro Cuesta, qu’amosó la so satisfaición por recibir esti gallardón que lleva “un nome tan reconocíu na llingua asturiana”.

El sotrondín acudió esta mañana al Centru de Cultura Antiguu Institutu pa recibir de manes de Miguel Barrero, direutor de la Fundación Municipal de Cultura, Educación y Universidá Popular, el retratu d’Andrés Solar que sirve como premiu físicu del premiu, que cuenta tamién con una recompensa de 3.000 euros y la espublización del llibru. Ésti va presentase na Feria del Libro de Xixón (FeLiX) que va celebrase la selmana del 18 de xunu.

Xunto a los dos escritores, Lali Solar, hermana del poeta que nos dexó prematuramente nel 1984 con 29 años nun accidente de tráficu. Y ente’l públicu, el so maríu y cuñáu, Jesús Rodríguez.

Novela histórica

Ye’l proceder de la organización del premiu, na que participa activamente la Oficina de Normalización Llingüística, el nun desvelar el nome del ganador enantes d’esti actu. Pero la presencia de Barreñada nun dexaba llugar a la dulda.

“Ye’l tercer premiu que llevo esti añu, una cosa un poco inesperada, pero cuando ún se presenta a un premiu tien la convicción de que lo fixo lo meyor posible, y anque siempre ye un poco una sorpresa, tamién siempre s’espera ser reconocíu. El xuráu consideró que la obra taba bien y ye d’agradecer. Da muncha confianza”, espresó l’autor.

La obra reconocida foi ‘La guerra del Medrosu’, presentada baxo’l nomatu de Lord Holland. “Ye una novela histórica con dalgunos toques fantásticos. La idea yera escribir dos obres históriques sobre los dos periodos históricos que más m’interesen: la conquista d’América o la llegada de los europeos a América, como queráis dicir, que foi cola que gané’l Xosefa Xovellanos; y esta época, que ye la previa a la Revolución Francesa hasta 1821, cuando muerre Napoleón”, esplicó.

“Escribir un tipu d’obra histórica lleva un trabayu d’investigación bastante grande que, per un llau, ye mui prestoso”, añadió, especialmente porque “yo tengo formación d’historiador”. “Tengo munches ganes de que’l llibru llegue a la xente”, finó Barreñada, qu’apuntara previamente que “la novela curtia ye un xéneru tamién mui prestosu; tienes que concentrar un poco más les coses, pero si sabes facelo bien pue quedar una obra redonda y mui guapa”.

Ganadores de prestixu

El xuráu del Andrés Solar tuvo conformáu por Manuel Ángel Vallina, conceyal de Cultura, como presidente, y por Xandru Martino, Juncal Mónica García Velasco y Milio Rodríguez Cueto, ganador de la primer edición con ‘Fortuna’, amás de María Xosé Rodríguez López, responsable de la Oficina de Normalización Llingüística, qu’actuó como secretaria. De les siete obre presentaes decidióse por mayoría por ‘La guerra del Medroso’, de la que rescamplaron “les referencies de la obra a la novela clásica europea d’aprendizaxe y crecimientu”.

Nel acta tamién quixeron “poner de manifiestu la calidá de les obres presentaes y la importante participación, lo que dio llugar a una intensu y estensu alderique”. Al abrir la plica, el ganador resultó ser Barreñada, un nome reconocíu de la lliteratura asturiana que da mayor prestixu al gallardón, como destacó na so intervención Barrero.

“En poques ediciones el premiu algamó una coherencia que nun taba buscada, pero que ye bien curiosa, porque si nel primer añu ganó una figura contrastada de la narrativa asturiana d’anguaño como ye Milio Rodríguez Cueto, esta segunda gánalu ún de los escritores que más tán despuntando nestos años”, lo que considera “una bona señal pal futuru”. Tamién quixo recordar que “nació l’añu pasáu col enfotu d’homenaxar y facer una alcordanza d’Andrés Solar, ún de los nomes fundamentales de los que se llamó primer xeneración del Surdimientu, nos años 70 del sieglu pasáu, que principió a reclamar un estatus dignu pa la llingua asturiana”, amás de “poner el focu na novela curtia, que ye un xéneru o subxéneru que siempre quedó un poco arrequexáu frente a la novela d’estensión tradicional”.

Pela so parte, Lali Solar quixo agradecer el recuerdu al so hermanu, citando espresamente a “María Xosé, que ye una de les promotores de too esto, anque habrá más detrás”, y amosó la so allegría pola esistencia d’un premiu, que se suma “a otru col nome d’él, el Pegollu” qu’entrega la Xunta pola Defensa de la Llingua Asturiana (XDLA), depués de tantos años de la so perda.

Na semeya, Barreñada col retratu d'Andrés Solar, Rodríguez López, Lali Solar, Barrero y Rodríguez.