Xabier Díaz: “Comprometémonos cola dignificación de la pandereta y intentamos dala a conocer na so espresión máxima”

El sábadu 18, a les 20 hores nel Teatru Nuevu de La Felguera, van facer parada n’Asturies dientro de la so xira basada principalmente nel so tercer discu, ‘As Castedrais Silenciadas’, los gallegos Xabier Díaz & Adufeiras de Salitre, conciertu que yá tien a la venta les entraes y que cuenta con Algaire como grupu convidáu. Asturies.com faló col músicu nacíu n’A Coruña nel 1969 sobre esti álbum, la pandereta y el panderu o la música tradicional gallega y asturiana.

Otra vuelta fai parada n’Asturies. ¿Ganes de tornar?

Sí, tenemos munches ganes de tornar. Será yá la nuesa cuarta visita y notamos munchu ciñu de la xente d’Asturies y muncha proximidá pola música asturiana, a la que tenemos especial querencia, sobre manera la música vocal y la música construyida con instrumentos de percusión tradicional.

¿Qué va atopar nesta ocasión el públicu asturianu?

Van alcontrar un repertoriu conformáu fundamentalmente pol nuesu discu ultimu, que se llama ‘As Catedrais Silenciadas’, y dalgunos temes que se foron añadiendo nesti últimu tour 2022/2023, que conformen un repertoriu un poco diferente a la nuesa visita última a Llangréu. Ye una representación coral y plural de muñeiras, xotas, pasodobles, agarraos...

Sigue en compañía d’Adufeiras de Salitre. ¿Qué tienen pa caltener tantu tiempu esta xuntanza?

Atopamos la complicidá y l’entendimientu necesariu pa siguir navegando xuntos. Deprendemos mutuamente y creo qu’entovía queden espacios a esplorar conxuntamente.

Yá van trés discos conxuntos. Fáleme del últimu, ‘As Catedrais Silenciadas’.

‘As Catedrais Silenciadas’ quería ser una especie de glayíu o llamada énte dalguna de les consecuencies del desaniciu del mundu rural, de les aldees. Alvertir que la desapaición de les aldees y de la xente que vive nelles de dalguna manera trai consigo la desapaición de la nuesa forma de vivir, da la propia idiosincrasia, del nuesu ADN propiu. Y de dalguna manera, contraponer, metafóricamente, tola atención que ponemos a la nuesa catedral más famosa en Galicia, la Catedral de Santiago de Compostela, y la desatención que damos a toes eses pequeñes catedrales silenciaes que son las aldees, les pequeñes ermites, la xente que l’habita, la so memoria… Éses son les catedrales silenciaes.

Por exemplu, una catedral silenciada pue ser l’idioma, el gallego; el folclore; les piedres d’una pequeña casa; d’un horru; de cualquier pequeña aldea de Galicia…

Ponen en valor un instrumentu como la pandereta, xeneralmente venceyáu a les muyeres. ¿Ye tiempu de frayar estereotipos?

Ye tiempu de reasitiar y de recolocar, de dalguna manera, dalgunos de los elementos fundamentales de la música tradicional. Y esto valdría tanto p’Asturies como pa Galicia. Esto ye, per munchísimes décades, diría que cuasi tol sieglu pasáu, la música de gaita y la gaita alzáronse como instrumentu nacional de los nuesos dos pueblos. Y, precisamente, por ser les panderetes y panderos instrumentos tocaos por muyeres, foron tamién una catedral silenciada. Colocáronse siempre nun llugar posterior y de retaguardia con respeuto a un instrumentu tan icónicu como la gaita. Asina que nós, dende l’entamu d’esti proyeutu, lo que procuramos foi comprometenos cola so dignificación y intentar dar a conocela na so espresión máxima; intentar tocala de la meyor manera posible buscando la escelencia pa dignificala y qu’ocupe’l llugar na pirámide de los instrumentos de música tradicional que-y correspuende que, dende’l mio puntu de vista, ye munchu más altu que’l que taba ocupando.

¿Cómo ye’l momentu actual de la música tradicional gallega y del baille?

Tengo que dicir que soi dalgo roceanu a los trunfalismos. Hai un discursu coleutivu nes entrevistes nes que siempre redundamos na escelencia, na bona salú, ye’l meyor momentu pa la música, etc… Ye un momentu interesante nel que tán asocediendo munches coses y paezme que pa pasar d’un momentu interesante a un bon momentu tendríen que cuayar una serie de circunstancies. Por exemplu que más xente se convirtiera en profesional nesti campu de la música y del baille tradicional; la conversión del mundu aficionáu al mundu profesional ye ún de los síntomes de bona salú de cualquier palu de les artes. Asina que sí que ye verdá que vivimos un bon momentu nel sentíu de qu’hai una gran cantidá de xente participando de la música tradicional y del baille, pero creo que deberíamos tar nun puntu d’inflexón y llograr qu’una parte importante que participa del baille y de la música consiguiese dedicase profesionalmente a eso. Dicho esto, numbéricamente, a nivel de participación coleutiva y de sofitu social, vivimos un momento mui interesante.

¿Qué papel xugó la TVG na visibilización de lo tradicional en Galicia?

Xugó un papel importante porque hebo periodos, como pudo ser la emisión del programa ‘Alalá’ per dellos años y tamién una seición qu’ocupaba una parte un programa mainstream que se llama ‘Luar’, naquel momentu presentada por Mercedes Peón, que de dalguna manera ayudó muncho a visibilizar dalgunes realidaes, la realidá de la música nes aldees, de les agrupaciones de música y baille tradicional… Nesi sen yo creo que foi tremendamente positivu. Dicho esto, creo qu’en pretéritu sí que la TVG xugó un papel interesante y importante.

¿Cómo se ve dende’l país vecín la música tradicional asturiana?

Tengo la sensación de que la proyeición de lo que ta asocediendo en Galicia nos años últimos, que de dalguna forma tamién se proyeuta nel restu del Estáu, tien un ciertu paralelismu n’Asturies. Esto ye, hebo un momentu d’eclosión importantísimu de la música folk y tradicional fecha con gaita y creo que cada vez más ta ocupando l’espaciu que-y correspuende la música fecha con pandereta y sobre manera fecha por muyeres y música cantada. Asina que veo que la música asturiana tien un potencial increíble y que nos años ultimos ta tamién estallando; cada vez hai mas agrupaciones, cada vez somos más conocedores de les agrupaciones de música tradicional y folk qu’hai nel país vecín y congratulámonos muncho porque les seguimos, tenemos munchos collacios y paeznos que la música tradicional asturiana, sobre manera la música vocal, ta viviendo un estraordinariu momentu.

Nel conciertu de La Felguera va haber convidaos. ¿Podría adelantame dalgo?

Sí, van participar les moces del grupu Algaire, coles que tuvi la oportunidá de collaborar na so ópera prima, nel so primer discu, qu’amás me paez que ta acabante de ser premiáu, y va ser un placer. Ésti ye ún de los exemplos que ponía enantes de la proyeición de música vocal y de la música que se fai acompañada de panderetes y panderos n’Asturies. Amás, con un amiestu mui diferente porque faen una propuesta na que s’acompañen d’un guitarrista llétricu, lo que-y da al proyeutu una cierta singularidá. Pa min va ser un placer poder collaborar otra vuelta. Yo collaboré nel discu grabando les voces pa un tema y agora creo que va ser mui guapo realcontranos en La Felguera, na so casa, y facer dalgún tema nuesu, dalgún tema suyu, mezclanos… De xuru que va ser mui prestoso y mui interesante.

Son yá munchos años sobre los escenarios y munchos países visitaos. ¿Con qué momentos quedaría?

Prestaríame quedar colos que tán por venir, pero de dalguna manera sería falsiar la respuesta porque m’entruga por momentos pasaos. Ye mui difícil escoyer dalgún. Les presentaciones de los nuesos discos en Galicia son mui especiales. Siempre facemos una xira de presentación en teatros y esos momentos son importantes.

Cuando viaxamos fuera también, chequiar y llegar a públicos diferentes resulta tremendamente gratificante y nós tuvimos oportunidá de viaxar per tola Península. Recuerdo conciertos mui especiales en munchos llugares. Acabamos de tar en Montevideo y Buenos Aires y foron dos conciertos peremocionantes. El nuesu últimu en Barcelona, tamién. L’últimu conciertu en La Felguera foi mui cálidu, con una respuesta mui cariñosa por parte de la xente. Recuerdo un conciertu n’Arxel con munchísima complicidá col publicu... Seria difícil quedame sólo con ún.

Y tamién recordé estos díes la nuesa presentación que tuvo llugar nun open concert del Festival Womex nel 2014. Entovía nun taba nin la banda constituyida y ellí ficimos un conciertu de nueve minutos de música; tocamos 2 temes qu’entovía siguen acompañándonos agora nos direutos. Y aquel conciertu nel Auditorio de Galicia tamién foi mui especial delantre de programadores de munchos llugares del mundu.

¿Qué proyeutos tien en mente pal futuru?

Esti añu 2023 vamos facer una xira pa la que tamos modificando dalgunes pieces del repertoriu, con una serie d’ensayos centraos nésto. Nun podría desvelar tolos eventos nos que vamos tocar porque entovía nun podemos facelos públicos, pero va ser un añu nel que vamos tocar en places mui especiales, en dalgunes capitales nes que llevamos munchu tiempu ensin tocar, y creo que serán conciertos mui diferentes.

Tamos acabantes d’anunciar la nuesa participación nel Festival Celta de Ortigueira que tamién ye un festival mui importante del nuesu país. Y fuera de Galicia, regresaremos a Madrid, Barcelona, Toledo, Lleón, Lisboa y Porto, que facía tiempu que teníemos ganes de visitar les dos ciudaes más importantes de Portugal. Asina que nos espera una xira mui intensa y enfrentámosla con munchísimes ganes y munchísima enerxía.