Xabier Díaz: “Dende’l noroeste ta revitalizándose la música de raigañu”

El Teatru Nuevu de La Felguera va recibir otra vuelta la visita de Xabier Díaz & Adufeiras de Salitre, agora pa presentar ‘Axúdame a sentir’. Ésti ye’l sétimu trabayu de músicu d’A Coruña del 1969, que convidó a collaborar nél a Marta Elola.

Asturies, y en concreto La Felguera, yá son paraes fixes de les sos xires. Nesta ocasión presenten álbum nuevu, que salió’l 1 de marzu. ¿Cómo se ta recibiendo?

Va aproximadamente un mes que salió’l discu y l’acoyida per parte del públicu nun pue ser meyor, anque entovía nun tuviemos la oportunidá de chequialo fuera de casa. En Galicia de cuatro conciertos en trés escosáronse les entraes y nel otru la taquilla foi realmente estraordinaria, con 1000 tickets, asina qu’equí, en casa, l’acoyida nun pue ser meyor. Llegamos con muncha emoción a Llangréu, que será precisamente la primer parada fuera del nuesu país.

Sigue trabayando con Adufeiras de Salitre. Ye díficil yá concebir la so figura ensin elles.

En dalgún momentu enantes de trabayar con elles yá tuviera emancipáu, pero me siento cómodu y ye cierto que los últimos diez años foron d’un camín en paralelu y obviamente son una parte fundamental d’esti proyeutu y un elementu vertebrador del mesmu. Asina que sí, siéntome mui cómodu trabayando con elles.

¿En qué se paez y diferencia de los sos trabayos anteriores?

Fundamentalmente diría que se paez na participación de les Adufeiras de Salitre, que son un elementu que de dalguna manera lu dota d’una identidá mui clara. Y como elementu diferenciador, per una parte que per primer vez apaez na nuesa atmósfera una guitarra llétrica, un tecláu, un baxu… Y per otra parte, que los temes son cada vez mas autorales. Cada vez escribo más y cada vez la música ta más pensaba por min y creada dende una perspeutiva más autoral que de facer una versión d’un tema tradicional.

¿Qué papel xuega’l recuerdu de la so güela Obdulia na so composición?

Nun diría tanto na composición como que, nesti casu, ella me regaló –sin ella sabelo, por cierto– el títulu del álbum. Ella siempre me dicía esto de “axúdame a sentir”, normalmente cuando taba con situaciones adverses, como una suerte de pidimientu d’auxiliu. Y, de dalguna manera, tamién la mio güela materna representa esa memoria coleutiva de les muyeres, tan tapecida y tan oculta durante tantos años. Yeren amás muyeres que pensaben que la so sabencia y tol patrimoniu inmaterial qu’atesoraben nun tenía valor, y nun podríen tar más equivocaes, por supuestu.

El discu cuenta con delles collaboraciones, una d’elles asturiana. ¿Cómo surdió la oportunidá de trabayar con Marta Elola?

Surdió gracies al mio amigu Pablo Carrera, que m’entrugó l’añu pasáu si la conocía. Yo-y dixi que non, asina que procedí a llamala nesi mesmu momentu y a convidala a participar nel nuesu conciertu en Llangréu. A min apetecíame que fuese ella la que nos propunxere un tema pa facer nel conciertu y l’esocoyíu foi la ‘Ronda de Borbolla’, que ye un tema de la fastera oriental asturiana, que ye onde ella vive y de la que conoz fondamente’l so folclor. Y foi una sorpresa tanto al interpretar el tema, que foi un momentu mui emotivu, como al conocela de forma personal, porque ye una persona absolutamente maraviyosa, empática, sabia, humilde… Tien toles virtúes que yo almiro. La verdá ye que-y debo a Pablo esta amistá que sé que me va durar tola vida.

Fáleme del tema qu’interpreten.

Naquel momentu-y propunxi que m’unviase dalgunos temes y recuerdo que me mandó dellos, pero ésti rápidamente paecióme qu’encaxaba mui bien col nuesu grupu. Y convirtióse nún de los momentos más especiales d’aquella nueche, y creo recordar que ye’l tema mas reproducíu del álbum últimu en Spotify. Asina que’l cancioneru asturianu nos traxo esti regalu.

¿Cómo ye la puesta n’escena d’esti trabayu discógraficu?

Ye un pelín diferente nel sentíu de que les Adufeiras asumen la responsabilidá de tar nel frontal del escenariu, d’ocupar la boca del teatru, y los músicos pasen, non a un segundu planu, pero sí escénicamente tán xusto tres d’elles. Tamién apaez la figura d’un guitarrista, un músicu tremendamente virtuosu que toca per primer vez con nós, Virxilio da Silva, y qu’aporta una nueva sonoridá a la propuesta.

Anuncien pal conciertu, amás de la presencia d’Elola, la participación de más músicos asturianos. ¿Qué me podría avanzar?

Puedo avanzar que va tar una de les figures fundamentales de la música tradicional asturiana, que ye Chus Pedro, un músicu al que yo almiro dende va munchísimu tiempu, dende los tiempos de Nuberu, y que tuvo precisamente nel conciertu pasáu ente’l públicu. Ellí conocílu y ellí concertamos precisamente esta promesa que vamos cumplir esti añu, que ye una promesa en plural, pa los dos, pero qu’en singular ye un regalu de los más grandes que me da va dar la música porque ye una persona inmensa tanto no musical como na parte humana. Faime una ilusión terrible collaborar con Chus Pedro. Y aparte de Marta y Chus Pedro, van tar 6 Riales, que ye una d’eses bandes nueves que tán revolucionando la escena tradicional asturiana. Tamién me fai muncha ilusión nesi sen coneutar otra vegada con xente que ta escribiendo les páxines nueves de la música asturiana.

La pandereta sigue siendo un instrumentu fundamental nel so proyeutu musical. ¿Cómo ve la revitalización que ta viviendo tanto n’Asturies como en Galicia?

En realidá cuéstame trabayu velo porque más que cronista soi particípe d’eso, entós siempre me cuesta un poco de trabayu velo dende fuera. Nosotres somos una parte de les que tán precisamente trabayando para que la pandereta y los instrumentos de percusión de mano ocupen el llugar que se merecen na seición de los instrumentos de música tradicional de los nuesos países, polo que, siendo un amante del instrumentu y dedicando-y una parte fundamental de la mio vida al so estudiu, nun puedo otra que celebralo y tar contentu.

¿Ta de moda lo tradicional?

A min nun me gusten les modes porque me paez que lleven implícitu daqué pasaxero o un elementu que puede inequívocamente llevalu a ser daqué efímero. Y yo me niego a pensar que lo tradicional tea de moda porque creo que lo tradicional ye una parte fundamental de la construcción de los pueblos y de les sociedaes. Sería como dicir si ta de moda la lliteratura del sieglu XXI y yo niégome a pensar neso.

Dicía nuna entrevista reciente que “ye muncho más esportable Rodrigo Cuevas que cualquier sucedaneu d’un grupu pop de Manchester”. ¿Cómo se ve dende Galicia l’apaición yá consolidada d’esti artista y d’otres propuestes como L-R o Algaire, presentes nel so conciertu del añu pasáu?

Cola allegría de l’amistá, porque Rodrigo ye un amigu, y lo mesmo pasa coles collacies d’Algaire, qu’efeutivamente tuvieron l’añu pasáu nel nuesu conciertu, tamos viendo como dende esti noroeste peninsular surden un montón de propuestes que tán de dalguna manera revitalizando la música de raigañu y que tamién tán ayudando a que desapaeza esti prexuiciu de que namái nel sur hai música tradicional y música peninsular esportable. Asina que nesi sen préstame muncho que dende’l noroeste surdan munches propuestes qu’arriquezan estes músiques de raigañu en tola Península.

Amás de la so collaboración con Elola, va poco pasó tamién per equí otru músicu importante como Carlos Núñez pa tocar xunto con intérpretes asturianos. ¿El contautu ente la música tradicional gallega y asturiana ye agora mayor que nel pasáu?

Nun sé si ye mayor que nel pasáu, pero yo necesito alcontrame colos músicos y músiques qu’hai n’Asturies, necesito compartir música con ellos, necesito conocelos, falar con ellos, poner en común les idees, les nueses maneres de ver la música.... Poner en común lo común y lo que nun lo ye, eliminar prexuicios y sobre manera dexar de vivir d’espaldes. Hai una frontera alministrativa que nun se ve y que nos fai ser mui vecinos y mui familiares, asina que m’allegro muncho si ye asina. Nós siguiremos afondando nesa idea y na constitución d’una amistá duradera nel tiempu.

Pa finar, ¿a qué otros llugares va lleva-y esta xira?

Vamos tar nesi noroeste peninsular, que ye una apuesta na qu’enantes insistía: Valladolid, Lleón, Zamora, Bilbao… Regresaremos tamién a Madrid y Barcelona, amás de la xira que facemos siempre nel nuesu país y que ye tremendamente intensa, asina que tamos mui felices d’arrancar xira n’Asturies.