“Evidencia que nos núcleos urbanos hai un nivel de comprensión d’asturianu que permite facer una política llingüística decidida”, apunta González Riaño sobre l’estudiu

El presidente de l’Academia de la Llingua Asturiana (ALLA) considera que “pa facer efeutivu esi conocimientu llingüísticu” que detalla l’estudiu ‘Conocimientu del asturianu nos ámbitos urbanos: Uviéu, Xixón y Avilés’ “necesites una política llingüística de dignificación del usu social del asturianu”. Xosé Antón González Riaño treslladó l’avance de resultaos al Gobiernu y a los grupos parllamentarios.

“Facer esti estudiu sobre’l conocimientu del asturianu nos ámbitos urbanos d’Asturies yera un vieya aspiración de l’Academia, en concreto mía, y diéronse les circunstancies organizatives agora pa poder llevalu alantre”, esplicó. La razón ye que “hasta agora xugábase col tópicu de que’l conocimientu del asturianu taba llendáu a ámbitos rurales, aisllaos, etc. Y les conclusiones del estudiu treslladen la idea d’un conocimientu funcional del asturianu más qu’aceptable nes trés principales ciudaes d’Asturies: Uviéu, Xixón y Avilés, onde se xunta aproximadamente’l 50 por cientu de la población asturiana”.

“Lo qu’esta población demuestra conocer del asturianu correspuéndese bien colo que diz que sabe”, siguó González Riaño, “lo que dicho d’otru mou, nun hai incoherencies ente’l conocimientu real y la opinión suxetiva de la xente”. Asina, “pa nós, como Academia, les implicaciones del estudiu son especialmente importantes a la hora d’implementar una política llingüística axustada a la realidá sociollingüística asturiana”.

Y ye que “cuando se fai una política llingüística hai que tener en cuenta a los destinatarios. Hasta agora lo que se nos dícia ye que l’asturianu tien un procesu de recuperación mui revesosu, namás que s’entiende o fala nos pueblos, etc. Esto ye la evidencia que los núcleos urbanos más relevantes d’Asturies hai un nivel de comprensión d’asturianu, de destreza llingüística n’asturianu, que permite facer una política llingüística decidida que va ser acoyida y va ser entendida, porque llingüísticamente va entendese”.

Dignificación del usu social del idioma

L’estudiu amuesa la capacidá llingüística, pero “otra cosa ye poner en práutica esi conocimientu llingüísticu”, pa lo que “necesites una política llingüística de dignificación del usu social del asturianu. Los resultaos d’esti estudiu garanticen el nivel d’asunción, dende’l puntu de vista de la comprensión, que se podría facer con una política llingüística decidida”, lo que pal presidente de la institución ye “el gran interés” del trabayu fechu por Francisco José Llera Ramo.

L’informe completu con tolos datos y variables va tar disponible nel plazu d’un mes, confirmó González Riaño, pero apuntó que diba treslladar esti avance de resultaos “güei mesmu al Gobiernu del Principáu d’Asturies, a los estremaos grupos parllamentarios y a instituciones claves pa la normalización social de la llingua n’Asturies”.

Na semeya, González Riaño y Llera Ramo nun momentu de la presentación del estudiu.