Los servicios públicos y la crisis demográfica, esmolecimientos principales nel conceyu llocal d'Aína en Xixón

Metanes esti mes l'agrupación llocal del partíu asturianista constituyida'l miércoles va convocar otra xunta abierta a la ciudadanía.

El Centru Municipal Integráu de L’Arena acoyó ayeri'l primer conceyu d’Aína en Xixón, nel que participaron la metá de les persones inscrites nel conceyu nel procesu de creación d'esta formación nueva d'izquierda que ta organizando anguaño les sos asamblees llocales. Los promotores definieron esti primer alcuentru como "constructivu y marcáu poles ganes de trabayar en positivo". 

L'enfotu ye plantar la semiente "pa que xorreza un nuevu asturianismu políticu basáu na cercanía, el pragmatismu y con propuestes pa construir una ciudá y un país con mayor xusticia social y arguyosu de la so identidá". Per hora y media los presentes fixeron un diagnósticu mui críticu cola situación social, económica y cultural d’Asturies y de Xixón, tratando cuestiones como la despoblación y l’avieyamientu de la población, les llistes d’espera nes guarderíes y na sanidá, la turistificación, la contaminación, el problema d’accesu a la vivienda, la perda d’identidá y comunidá nos barrios o’l retrocesu cultural y asociativu.

Pa dar respuestes, acolumbráronse les primeres exes sobre los qu’Aína podría entamar el so llabor políticu en Xixón: defender el fortalecimientu y desarrollu de los servicios públicos; ufrir respuestes a la crisis demográfica y económica; trabayar por una vida digna; y la revitalización cultural dende los barrios de la ciudá.

Primer Asamblea Llocal, en febreru

Pa facilitar l'asistencia de tolos inscritos qu'ayeri nun pudieron participar nel alcuentru, va convocase un conceyu abiertu nuevu metanes el mes al que ta otra vuelta convidada tola ciudadanía interesada en participar nel proyeutu. La primer Asamblea Llocal de Xixón d'Aína va celebrase a lo primero de febreru, zarrada yá a los que dean el pasu d’afiliase na formación, pa entamar a definir les llinies d’aición política del partíu.