Xixón conviértese nel segundu conceyu en constituyir agrupación llocal d'Aína

La formación asturianista sigue con un actu nel Centru Municipal Integráu de L'Arena cola campaña #AbrimosCamín qu'entamó n'El Nalón.

Una trentena d'inscritos ta llamada a participar na constitución de l'agrupación llocal de Xixón, prevista pa esta tarde a les 19 hores. La cita, abierta a tola xente interesao, va servir tamién pa informar del procesu de constitución d'Aína, tratar delles problemátiques y inquietúes qu'afeuten al conceyu y compartir idees.

Aína sigue asina cola campaña #AbrimosCamín cola que ta activando les sos primeres organizaciones municipales. D'esti mou'l partíu busca consolidar l'afiliación de les inscrites, aportar a más xente y entamar el so trabayu políticu dende la cercanía, pa dar respuesta a les necesidaes de parroquies, barrios y conceyos.

La primera foi la d'El Nalón, constituyida en Sama'l 22 d'avientu. L'actu celebráu na Casa Cultura aconceyó a un grupu de persones al que se-yos informó del camín andáu pol partíu soberanista d'izquierdes, pa depués abrir un alderique nel que los presentes dieron la so visión de cómo entamar a trabayar pola xente del valle.

"El partíu sigue avanzando pa construyir pasín a pasu un movimientu asturianista modernu, cercanu, realista y con un firme compromisu cola xusticia social, con una economía qu'afite futuru n'Asturies, col feminismu, col territoriu, colos servicios públicos, cola democracia participativa, colos derechos humanos, col internacionalismu y cola cultura", apunten dende Aína.

Na semeya, un momentu del Congresu Fundacional del partíu celebráu en payares en Les Vegues.