El Semando Fest presenta’l relevu xeneracional na música asturiana en cuatro estilos estremaos

Presentar el relevu xeneracional na música asturiana, abrila a públicos nuevos y reivindicar les sales de conciertos. Son los oxetivos principales colos que naz Semando Fest, un festival qu’entemez aspeutos de gala colos d’un conciertu que va axuntar sobre un escenariu n’Uviéu a Alicia Villanueva y Luis Álvarez Pola, a Loína, a Algaire y a Llevólu’l Sumiciu.

Musicasturiana.com entama esta iniciativa, que sirve tamién como festexu del so llustru de vida, cola filosofía de da-y oportunidaes a les y los creadores mozos. Asina, tolos músicos participantes tienen la carauterística común de contar con menos de 34 años, al igual que toles persones implicaes nel eventu: la diseñadora Cecilia Díaz encargóse de la identidá visual y la cartelería; los presentadores del programa radiofónicu ‘Héroes ensinNome’, Yedra Riesgo y Raúl Alonso, van presentar l’eventu y entrevistar a los artistes enriba l’escenariu; y la fotógrafa avilesina Lucía Garó va facer les semeyes y el videu resume.

Hai que rescamplar tamién qu’esti equipu humanu ye igualitariu, con 9 muyeres y 8 homes na organización. Un eventu, poro, nel que la mocedá ye la principal protagonista, cola intención tamién de llamar l’atención a la xente mozo pa que “conoza los soníos de raigañu d’Asturies y que puea ver cómo hai rapaces y rapazos de la so mesma edá creando cultura asturiana”.

El cartelu escoyíu pa ello ta formáu por dos de los nomes que protagonicen el relevu xeneracional na asturianada, Villanueva y Álvarez Pola; el tríu acústicu de folk atlánticu Loína; la esitosa banda que fusiona la música tradicional con otres más pop, Algaire; y el dúu de música electrónica, Llevólu’l Sumiciu.

Preciu reducíu pa menores de 26 años

El Semando Fest va celebrase’l sábadu 4 de febreru en la Lata de Zinc, con entraes yá a la venta en Musicasturiana.com a 7 euros pa menores de 26 años y de 10 pal restu, dende les 19.30 hores. Ixuxú Cultura participa na organización d’esti festival que cuenta col patrociniu de la Conseyería de Cultura, Política Llingüística y Turismu al traviés del ciclu ‘Asturies, Cultura en Rede’, Caja Rural de Asturias, el Conseyu de la Mocedá del Principáu d’Asturies y el Conseyu de la Mocedá d’Uviéu.