“Al baxar del escenariu en Lorient yá pensamos en trayer ‘Música pa tornar páxaros’ a Asturies”, rellata Quintana

El sábadu 6 d’agostu estrenábase nel LI Festival Interceltique de Lorient l’espectáculu ‘Música pa tornar páxaros’ de Mapi Quintana, conciertu inaugural de l'Année des Asturies. “Al baxar del escenariu yá pensamos en qu’había que trayelu a Asturies pa que lo viera tola xente que nun pudo dir hasta ellí”, apunta la cantante ḷḷeniza, que'l sábadu lu lleva al xixonés Teatru de la Llaboral.

“Foi mui prestoso. El fechu de representar a Asturies y de ser el conciertu inaugural yera una responsabilidá pal equipu de nueve persones que lu punxo n’escena, pero foi mui emocionante”, esplica la cantante, que guarda una gran esperiencia de tolo vivío aquellos díes n’An Oriant xunto colos sos compañeros. Ente’l públicu, munches asturianes y asturianos, y representantes de Cultura, “que yá tuvieron la idea nesi mesmu momentu de que se fixera equí. Al baxar del escenariu yá pensamos en qu’había que trayelu a Asturies pa que lo viera tola xente que nun pudo dir hasta ellí”, esplica.

Gracies a esi enfotu de la conseyería, el públicu va tener la oportunidá de presenciar ‘Música pa tornar páxaros’ mañana en direuto en Xixón, dende les 20.30 hores nel Teatru de la Llaboral, con entrada llibre previa retirada d’invitación, entovía disponibles nesti enllaz. “Va ser esautamente igual a lo que fiximos la otra vez”, un espectáculu musical “nel que tien muncho pesu lo visual”.

Quintana ye la responsable del mesmu, axuntándose con un equipu compuestu por César Latorre (piano), Sonia Cartón (voz y sintetizador), María Sanmiguel (voz y violín), Thomas Welvaadt (trompeta) y Juanjo Díaz (percusión). Marina Durany, mentes, encárgase del arte visual.

P’avanzar nel duelu

Anque munches vegaes refiérense a ‘Música pa tornar páxaros’ como un homenaxe a Elías García, músicu que nos dexó prematuramente nel añu 2019 y col que la cantante guardaba una gran amistá, “nun nació como tal”. “Ye un cosa personal p’avanzar nel duelu con él, al que quería muncho”, apunta al respeutu poniendo tamién nel recuerdu a toles persones que perdimos na pandemia.

No musical, Quintana presenta un repertoriu dafechu n’asturianu con composiciones orixinales y arreglos d’otres tradicionales, con presencia de dalgún cantar del archivu de Xosé Antón Fernández ‘Ambás’ y Ramsés Ilesias que s’incluyó en ‘Música tradicional en Conciyu Ḷḷena’, d’onde ye orixinaria. Nel casu de que’ públicu pida ‘otres trés’, podría sonar tamién un tema en castellanu de l’autora y panderetera vallisoletana Cris Zagaleja.

En ‘Música pa tornar páxaros’ va notase la influencia de la intérprete, cantante de jazz, en melodíes, arreglos y carga harmónica, y nun va faltar un espaciu pa les improvisaciones. Un espectáculu únicu que, en principio, nun va tener tercer representación, anque l’enfotu de les persones involucraes nel mesmu, 6 sobre l’escenariu y 3 fuera, ye “movelu” pa poder llegar a la mayor cantidá de xente posible.

Na semeya, un momentu del espectáctulu en Le Théâtre d'An Oriant.