Mapi Quintana presenta'l discu del espectáculu ‘Música pa tornar páxaros’ n'Avilés

Va ser la segunda oportunidá pa sentir en direuto n'Asturies los cantares d'esta obra estrenada n'An Oriant n'agostu.

Nel marcu del LI Festival Interceltique de Lorient presentábase l’espectáculu ‘Música pa tornar páxaros’ de Mapi Quintana, conciertu inaugural de l'Année des Asturies. Ésti podía disfrutase en casa, en Xixón, el 3 d'avientu, y agora llega a Avilés.

Va ser esta tarde, a les 20 hores, nel Auditoriu del Centru Niemeyer, con accesu llibre, anque ye necesario retirar previamente invitación na puerta, na Llaboral en Xixón y nel Centru d'Interpretación Turística del Principáu d'Asturies (CITPA) n'Uviéu. Nesta ocasión, el conciertu va servir de presentación del discu que contién los cantares d'esti espectáculu dedicáu a Elías García.

Ésti tien un formatu únicu y orixinal, con un CD que va dientro d’una caxa de cartón artesanal que tien dellos elementos decorativos y qu’inclúi una postal por cada cantar, fecha con munchu procuru pola diseñadora gráfica d’esti proyectu, l’artista catalana Marina Durany. Ye una pieza de coleicionista qu’engalana tol conceptu d’esta obra tan destacada.