La gallega Novo participa na segunda parte del ciclu de poesía QED

Va tar acompañada por Marta Mori y María García Díaz nel actu con sede n'Uviéu.

El ciclu poéticu internacional Quod Erat Demonstrandum (QED), que coordina Miguel Rodríguez Monteavaro y entama l’Asociación Cultural Mezá col sofitu de la Conseyería de Cultura, Política Llingüística y Turismu, celebra esti vienres la segunda sesión de les trés programaes nesta primer edición. La convidada nesta ocasión ye la poeta gallega Olga Novo, Premio Nacional de Poesía nel 2020 col llibru 'Feliz idade' y "una de les voces con más personalidá de la poesía contemporánea ibérica".

La cita va ser a les 19 hores nel salón d'actos de la Biblioteca d'Asturies ‘Ramón Pérez d'Ayala’ y la escritora va poder interactuar y intercambiar esperiencies con dos de les autores más reconocíes del país, Mori y García Díaz. "L’oxetivu principal del QED ye promocionar y dar voz a los y les poetes en llingua asturiana y gallego-asturiano fuera d’Asturies y trayer dellos referentes qu’escriben n’otres llingües como exemplu de lo que se ta faciendo actualmente n’otres zones d’Europa", apunten dende la organización.

D'igual forma, naz "col enclín de ser un puntu d’encuentru pa les diferentes xeneraciones y estilos de poetes asturianos, buscando siempre la calidá y la visión de futuru lliterariu". La primer sesión axuntó'l mes pasáu a la occitana Aurélia Lassaque con Xaime Martínez y Xosé Antón Fernández ‘Ambás’, y la tercera y última va tener llugar el 16 d'avientu col vascu Bernardo Atxaga y Nacho Vegas y Xuan Bello.