El vascu Bernardo Atxaga pieslla n'Uviéu'l primer ciclu de poesía QED

|
Marta Mori na segunda sesión del ciclu de poesía QED

Van acompañalu Xuan Bello y Nacho Vegas nesta tercer sesión d'una iniciativa que va tener continuidá, confirma la organización.

El ciclu poéticu internacional Quod Erat Demonstrandum (QED) pon el ramu a la so primer edición con otru cartelu de primer nivel. Joseba Irazu Garmendia, qu'emplega l'alcuñu de Bernardo Atxaga, ye'l convidáu nesta ocasión, tomando'l relevu de la occitana Aurélia Lassaque y de la gallega Olga Novo.

L'escritor vascu, Premiu Nacional de las Letras Españolas nel 2019, conocíu sobre manera poles sos noveles 'Obabakoak', 'El hijo del acordeonista', 'Siete casas en Francia' o’l poemariu 'Etiopia', va recitar la so poesía en compañía de Bello y Vegas, dos nomes asturianos bien reconocíos dientro de la escena lliteraria y musical a nivel estatal y inclusive internacional, de manera respeutiva. Dende QED rescamplen qu'ésta va ser una de les poques ocasiones de ver recitar n'Asturies en llingua asturiana al compositor.

L'actu va tener llugar esta tarde, a les 19 hores, nel salón d'actos de la uvieína Biblioteca d'Asturies 'Ramón Pérez de Ayala', con entrada llibre. Con esta sesión piésllase la primer edición d'esti ciclu coordináu por Miguel Rodríguez Monteavaro y entamáu pola Asociación Cultural Mezá, col sofitu de la Conseyería de Cultura, Política Llingüística y Turismu, pa "promocionar y dar voz a los y les poetes asturianos fuera d’Asturies y trayer dellos referentes qu’escriben n’otres llingües como exemplu de lo que se ta faciendo actualmente n’otres zones d’Europa", amás de "ser un puntu d’encuentru pa les diferentes xeneraciones y estilos de poetes asturianos, buscando siempre la calidá y la visión de futuru lliterariu".

La organización celebra'l bon recibimientu de la propuesta na que, per parte asturiana, tamién participó Xaime Martínez, Xosé Antón Fernández 'Ambás', Marta Mori y María García Díaz, y destaca que QED "yá se puede considerar un fitu na lliteratura asturiana" al tiempu que confirma "que de xuru va tener continuidá".

Na semeya, Mori na segunda sesión de QED celebrada'l 25 de payares.

 

 

Contador Estadistiques