Proponen una serie d'enmiendes a los PXE, ente elles la partida pa la promoción del asturianu

Los voceros económicos de Podemos na Xunta y el Conceyu d'Uviéu presentáronles xunto colos miembros de la candidatura Somos Asturies de les primaries, Cova Tomé y Xune Elipe.

La propuesta d'enmiendes a los Presupuestos Xenerales del Estáu (PXE) presentaes el vienres n'Uviéu tiene un valor total de 181,39 millones y, magar que'l plazu acababa esa mesma tarde, apunten qu'entovía podríen tramitase al traviés del Senáu. Pela Cámara Alta llegó l'añu pasáu la de 1,6 millones d'euros pa la "promoción y difusión de les llingües protexíes pola Carta Europea de les Llingües Rexonales o Minoritaries, a les comunidaes autónomes de Galicia, Asturies, Euskadi, Navarra, Aragón, Cataluña, València, Illes Balears” de la mano de Compromís, a propuesta de la Chunta Aragonesista.

Nun repartu posterior, Asturies recibió 290.000 euros, una cantidá qu'esti añu nun ta prevista nel borrador de los PXE al cayer dicha cantidá de 1,6 millones. Asina, na parte dedicada al Ministeriu de Cultura y Deporte, el documentu presentáu pide "recuperar la partida sobre l'asturianu", xunto con "incrementar la inversión nel prerrománico y el camín primitivu de Santiagu pa preservar el so caráuter de Patrimoniu de la Humanidá, asina como la proteición y conservación de Foncalada, Santuyano y Antiguu (la Cámara Santa y el Camín de Santiagu afeuta en gran parte del Uviéu Antiguu)", cantidá cifrada en 5 millones.

"Creemos que son propuestes que, anque partan de Podemos, pueden y deben ser asumíes pol restu de los grupos parllamentarios que dicen representar los intereses d'Asturies. Partíes qu'incluyen, por exemplu, l'aumentu de bonificación de los peaxes del Güerna, un tema que yá cansa a los asturianos y asturianes; que van destinaes a una zona especialmente en declive como ye'l suroccidente d'Asturies, como infraestructures p'meyorar la comunicación con esos conceyos o un plan especial d'emplegu", apuntó Elipe, númberu 2 de la candidatura que lidera Tomé, que tamién rescampló la partida pa la promoción del asturianu y gallego-asturiano. "Tamos a tiempu pa qu'estos PXE valgan pa reconducir la situación de declive que carecemos n'Asturies", finó.

Na semeya, Daniel Ripa, voceru d'Economía de Podemos na Xunta Xeneral; Elipe; y Rubén Rosón, voceru d'Economía del Conceyu d'Uviéu.