Podemos-EQUO Xixón pide “esplicaciones pola ausencia del usu del asturianu en distintos ámbitos a lo llargo d’esti mandatu”

La desapaición del topónimu ‘Xixón’ del Palaciu mientres el tornéu de tenis ATP 250, la falta de conteníos n’asturianu na web municipal y dellos incumplimientos del Plan de Normalización van tratase na Comisión de Servicios y Derechos Sociales del Conceyu d’esti xueves. Podemos-EQUO Xixón rexistró delles entruges al respeuto.

“Nun tamos viendo avances significativos en materia llingüística nel ámbitu municipal esti mandatu”, llamenta la vocera de la coalición, Laura Tuero. Una cuestión qu’esmolez a la coalición y que la lleva a treslladar a la comisión dellos asuntos.

Ún d’ellos ye l’ausencia del topónimu ‘Xixón’ nel ATP 250, que s’organizó baxó’l nome de Gijón Open, un tornéu de tenis de repercusión internacional cola presencia de dalgunes de les meyores raquetes del circuitu, como’l ganador Andrey Rublev, que compitió como númberu 9 del mundu. “El Plan de Normalización determina qu’ha d’emplegase en tolos eventos con proyeición esterior, como yera esi casu, onde l’Ayuntamientu amás aportó 1,2 millones d’euros pa la financiación del tornéu”, recuerda.

Tamián manda l’usu de la toponimia oficial “nes señales urbanes, los mapes y los documentos”. “Tamos viendo, por exemplu, que nun s’utiliza nes marques viales nos espacios pa vehículos llétricos”, polo que Podemos-EQUO va preguntar “en qué señales urbanes ta utilizándose la toponimia y el nome ‘Xixón’.

El Plan de Normalización Llingüística fala, d’igual forma, de “que s’ha d’emplegar l’asturianu nos conteníos institucionales de la nueva páxina web del Ayuntamientu, xunto col castellanu, teniendo qu’equiparar pasu ente pasu los demás conteníos, asina como les empreses municipales. Vamos facer la entruga de por qué nun s’aplicó tovía esta midida y cuándo va entamase”.

La Comisión de Sigimientu, con retrasu

Les otres cuestiones qu’esti grupu municipal quier treslladar son si toles ordenances y reglamentos aprobaos esti mandatu tán tornaos al asturianu, “que ye lo qu’establez la Ordenanza Municipal del Usu de la Llingua Asturiana”, y cuándo va convocase la Comisión de Siguimientu del Plan de Normalización. “Polo que nos consta, son ocho les normes aprobaes esti mandatu”, esto ye, “la Ordenanza de Movilidá Sostenible; el Reglamentu del Conseyu de Salú Animal; el Reglamentu del Conseyu de Cultura; el Reglamentu Orgánicu de Plenu; el Reglamentu de l’Asesoría Xurídica; el Reglamentu del Conseyu de Movilidá Sostenible; el Reglamentu Orgánicu d’Organización, Funcionamientu y Réxime Xurídicu; y el Réxime de Fiscalización y Intervención Llendada Previa nel Ayuntamientu de Xixón y los sos organismos autónomos en materia de contratación y subvenciones”, y ,“sin nun tan toes traducíes, que nos esclarien por qué ye asina, cuál ye’l motivu y amás cuánto van tar en facer la torna”.

“Tres l’aprobación del III Plan de Normalización Llingüística (2020-2023) nel Plenu d’agostu de 2020”, siguió Tuero, “había que crear una Comisión de Siguimientu, nel senu del Conseyu Asesor de la Llingua, pa velar pol cumplimientu de les midíes previstes”. “La Comisión “creóse en xunu de 2021; ye dicir, tardóse cuasi un añu”, añadió al tiempu qu’entruga cuándo se va convocar porque “se dixo que diba xuntase en setiembre y yá ta acabando’l mes d’ochobre”.

Na semeya, un momentu de la final de l'ATP 250 de Xixón entre Rublev y Sebastian Korda, onde namái pue vese'l logu de la villa col topónimu 'Gijón', nome que tamién apaez na pista en solitariu cuando la forma oficial ye la billingües 'Gijón/Xixón'.