‘Les coses pol so nome’, campaña pa que se siga falando de “la xarda, el piescu, l’arbeyu y la pataca” al facer la compra

“Quiero que los mios nietos sigan falando de la xarda, el piescu, l’arbeyu o la pataca”, afirmó Carmen Moreno, xerente de la Unión de Comerciantes de Asturias, que collabora en ‘Les coses pol so nome’. Esta campaña de la Direición Xeneral de Política Llingüística busca promover l’usu del asturianu y el gallego-asturiano a la hora de facer la compra y cuenta con folletos, cartelos y espacios en televisión y radio.

“La idea yera facer una campaña nun sector na que la mayor parte de la población d’Asturies se pudiera identificar, nel que los falantes d’asturianu se podríen sentir representaos, pero tamién una campaña pa los que non falantes s’indentificaran tamién por ello, y el sector de l’alimentación, que ye dalgo que toos usamos y qu’entovía tien esa vinculación del nome tradicional cola realidá de lo que comemos, pensamos que podría ser afayadizo”, apuntó Antón García, direutor xeneral de Política Llingüística, que la presentó esta mañana na sede de la Conseyería de Cultura, Política Llingüística y Turismu xunto con Moreno y Julio González Zapico, direutor xeneral de Comerciu, Entamadores y Economía Social. Carniceríes, pescaderíes y tiendes de fruta y verdura, amás de supermercaos medianos, son los establecimientos onde va centrase esta iniciativa “bastante ambiciosa pa los términos económicos nos que se pue mover Política Llingüística”.

En total van repartise “60.000 folletos n’asturianu y 3.000 n’eonaviego, y 24.000 carteles n’asturianu y 2.000 n’eonaviego”, pa llegar “a la mayor parte de les tiendes de les poblaciones grandes o medianes, y pueblos de tamañu mediu, de tol territoriu d’Asturies”. Amás, ‘Les coses pol so nome’ "vien reforzada con bastante aparatu publicitariu: mupis nes grandes ciudaes y nes villes de la zona occidental, prensa dixital, medios impresos llocales, radio y televisión con trés anuncios distintos n’asturianu y trés n’eonaviego”, campaña que va durar “d’equí a final d’añu”.

Dende güei yá pue vese los anuncios en TPA y sentise en RPA, y el repartu ente los comercios, según confirmó Moreno, ta en marcha. Los materiales cuenten con trés protagonistes especiales: una pita pa les carniceríes, una andarica pa les pescaderíes y un arbeyu pa les tiendes de frutes y verdures, chisgando’l güeyu xunto con un testu que pon “Llámame” xunto col so nome n’asturianu.

Yá dientro, un llistáu de productos xunto cola so torna al castellanu, como pue ser costielles, fégadu, venáu, amasuela, chicharru, tiñosu, ayu, miruéndanu o piescu. Bittia ye la empresa responsable del grafismu y Tresalia del repartu y la publicidá, mentes que la Unión de Comerciantes de Asturias collabora na so difusión, al igual que RTPA.

La importancia de les tiendes

Tamién participa na campaña la Direición Xeneral de Comerciu, Entamadores y Economía Social. “El comerciu configura les nueses ciudaes, los nuesos pueblos”, afirmó González Zapico, que rescampló la so importancia como llugar “de rellación y convivencia”, polo que “nel momentu que nos treslladaron esta documentación pa sofitar, más allá de los calces normales como radio, prensa y mupis, dalgo tan nuestru como ye la nuestra llingua”, nun hebo duldes sobre una campaña que calificó de “afayadiza” pa estos tiempos difíciles no económico.

Pela so parte, Moreno agradeció a dambos “que pensareis nes tiendes que pueblen los nuestros pueblos, los nuestros barrios. Esi sitiu onde nos alcontramos, onde mercamos, onde falamos”. Sobre la campaña apuntó que, al vela per primer vegada, tuvo’l recuerdu “de la mio güela, una muyer d’Ablaña cola que diba al economatu de Mina Nicolasa y que compraba arbeyos y pataques, nun mercaba ‘guisantes’. Nun mercaba andariques porque’l sueldu daba pa lo que daba, pero compraba pites y gochu”.

“Yo lo que quiero ye que los mios nietos sigan falando de la xarda, el piescu, l’arbeyu y la pataca. Y por eso’l comerciu tien esa función nesti casu. Nun ye una función de vender, ye una función, yo diría, hasta pedagóxica. Tenemos miles d’escaparates nes ciudaes y nos pueblos, pelos que pasamos tolos díes, y que son el sitiu onde podemos mostrar el puntu de conexón que tenemos de la nuestra cultura, la nuestra historia, la nuestra llingua y el nuestru futuru, cola tierra. Y nesa conexón sentimental, non económica, ta dalgo tan importante como la fidelización”, apuntó.

Na semeya, González Zapico, García y Moreno, nun momentu de la presentación, colos cartelos en primer planu.