El VII Entaína a Escribir foi pa Beatriz Quintana

Once autores d’ente 14 y 35 años participaron na uvieína Sala Borrón na séptima edición d’Entaína a Escribir, el concursu de microrrellatos improvisaos n'asturianu pa xente mozo qu'entamen les direiciones xenerales de Política Llingüística y de Mocedá, Diversidá Sexual y Derechos LGTBI. La ganadora foi Beatriz Quintana, mentes que’l segundu puestu mereciólu Kai C. Torel y el terceru, Pelayo Martínez.

La historiadora Arantza Margolles encargóse de conducir el concursu, que consiste en citar una frase escoyida al azar pa que los participantes ellaboren un testu a partir de la mesma nun tiempu máximu de 20 minutos. El maestru Víctor Suárez, el traductor Miguel Sánchez Canella y la escritora Laura Marcos conformaron el xuráu encargáu de valorar los microrrellatos y escoyer los trés meyores, que teníen como recompensa llotes de llibros y discos, amás de la posibilidá d’espublizar les sos creaciones nun futuru volume recopilatoriu.

L’escritu de Quintana, que va formar parte del xuráu de los Premios Asturies Moza qu’entama l’Institutu Asturianu de la Mocedá, foi’l que más convenció d’ente los once presentaos. “Nun tenía esperances de ganar y ye una allegría que fai falta nestos momentos”, espresó depués de conocer el fallu de los espertos, que dieron la segunda posición a Torel y la tercera, a Martínez.

Foron testigos del concursu los dos direutores xenerales, Antón García y Marcos Torre. Tolos participantes llevaron un llibru de recuerdu d’esta edición, la primera que se celebra fuera de la Selmana de les Lletres Asturianes.

Na imaxe superior, semeya de familia del VII Entaína a Escribir. Na inferior, los trés premiaos, Martínez, Torel y Quintana.