“Namás habrá reforma del Estatutu si hai una mayoría política garantizada na próxima llexislatura”, afirma Barbón na Xunta Xeneral

Esti llunes arrancó na Xunta Xeneral l’Alderique d’Orientación Política Xeneral del añu llexislativu 2022-2023 cola intervención del presidente Adrián Barbón. El socialista emplegó brevemente l’asturianu y el gallego-asturiano nel so discursu, y afirmó que “namás habrá reforma del Estatutu si hai una mayoría política garantizada na próxima llexislatura”.

Fíxolo depués de llamentar que “l’aritmética parlamentaria torgare l’apertura de puertes a la reforma del Estatutu, que nos permitiría declarar la oficialidá del asturianu y del eonaviegu. Asumo esti revés como lo que ye, un fracasu colectivu, como una oportunidá perdida que namás va tener solución si los grupos partidarios de la oficialidá algamen menos 27 escaños la llexislatura que vien”.

Nesti puntu añadió “dígolo con tola claridá. Namás habrá reforma del Estatutu si hai una mayoría política garantizada na próxima llexislatura”.

Esta afirmación apuntóla na estaya ‘Con orgullo de pertenencia’ del so discursu, apartáu onde emplegó en parte l’asturianu. “Esti apartáu llévanos a la estima de la nuestra historia y la nuestra cultura. Toi arguyosu de qu’Asturies remembremos los 1.300 años de la batalla de Cuadonga y el 25 de mayu de 1808 o, muncho más cercanu, de que seyamos capaces de celebrar les cuatro décades de desarrollu autonómicu. Una comunidá qu’escaez o fai menos el so pasáu y les sos señes d’identidá ye como un árbol enraigáu nuna sablera –sablera es playa, señor Blanco–, que malapenes resiste l’airón”.

Yá en castellanu aseguró que “un propósito en el que llevo trabajando desde el arranque de la legislatura” ye “fomentar el orgullo de pertenencia”, un capítulu del que “tengo la seguridad de que algunos grupos parlamentarios no le dan importancia, podría saltarmelo y no lo valorarían”. “Los asturianos y asturianas tienen hoy más orgullo de pertenencia, y probablemente en ello haya influido de forma decisiva la respuesta colectiva a la pandemia”, añadió.

Llicitación pa la rehabilitación del monasteriu de Corniana

Barbón emponderó’l llabor de la Conseyería de Cultura, Política Llingüística y Turismu. “La protección y difusión del prerrománico, el plan de hórreos y paneras, el proyecto del Camín de Santuarios compartido con Cantabria y la elección de la cultura sidrera como candidatura a patrimonio mundial de la UNESCO han contribuido a revalorizar nuestra identidad”, dixo enantes de rescamplar “dos aciertos que sobresalen en la gestión de la consejería por su relevancia y su importe económico”: asegurar l’ampliación del Muséu de Belles Artes y algamar 10 millones para la reforma de la estación de Valgrande-Payares, agora n’obres, cito.

Pa finar esti apartáu, anunció que “el Ministerio de Transportes, Movilidad y Agenda Urbana ya ha sacado a licitación las obras de la segunda fase de rehabilitación del monasterio de Cornellana (oficialmente ye Corniana/Cornellana la parroquia y Corniana’l llugar), con una inversión prevista de cuasi 2 millones d’euros”. “Largamente peleada por la Consejería de Cultura, esta decisión permitirá atender algunas de las urgencias d’una de las piezas más insignes de nuestro patrimonio cultural cuando se acerca a cumplir su milenario, fue fundado en 1024”, señaló.