Cadavéu lleva'l XXXIII Premiu al Pueblu Exemplar d'Asturies

El xuráu valora "la promoción de la cultura propia siguiendo la estela del Padre Galo".

Cadavéu presentábase per segunda añu siguíu al Premiu al Pueblu Exemplar d'Asturies nesta trentena tercer edición del gallardón y llevó l'ésitu que nun pudo algamar na convocatoria anterior nin va dos décades. Ventinueve candidatures aspiraben al gallardón qu'entrega la Fundación Princesa de Asturias, pero'l reconocimientu y la recompensa de 25.000 euros viaxó a Valdés.

Cristina Álvarez Mendo, Amada Álvarez Pico, María Cardín, Nicanor Fernández Álvarez, Felipe Fernández García, María Fernanda Fernández Gutiérrez, Begoña Fernández-
Costales, Pablo García Esteban, Adolfo García Martínez, Francisco González Orejas, Juaco López Álvarez, Ramón Rodríguez Álvarez, Jorge Suárez Díaz, Graciela Valle
Fernández y Consuelo Veiga conformaron el xuráu presidíu por Francisco Rodríguez García, con Fernando Delgado Álvarez como secretariu, que decidiéronse por Cadavéu "por saber caltener la diversidá productiva nel mediu rural, cola que consiguió tanto fixar población como asegurar el relevu xeneracional, y por ser una comunidá viva y organizada".

Tamién quixo rescamplar "l'atención que se da a los vecinos de mayor edá nel territoriu como valor social, asina como la promoción de la cultura propia siguiendo la estela del Padre Galo".

Respetu al topónimu tradicional

Como vien asocediendo nos últimos años, la Fundación Princesa de Asturias respeta la toponima oficial, polo que na presentación de candidatures, na información con respeuto a la concesión del premiu y, nel futuru, nos actos previsto pa ochobre cola visita de los reis d'España, emplega la toponimia tradicional, única oficial. Hasta'l 2014, cuando s'aprobó decretu qu'afitaba la toponimia de Valdés llueu del trabayu de campu fecho pola Xunta Asesora de Toponimia, 'Cadavedo' yera la forma reconocida.

D'igual forma, les bases del Premiu al Pueblu Exemplar espublícense n'asturianu, gallego-asturiano y castellanu.

Na semeya, horru del prau onde se celebra La Regalina.