Los alcaldes de la Mancomunidá de la Sidra sofitaron n'An Oriant la candidatura ‘Cultura Sidrera Asturiana’

“Ésti ye ún de los meyores escaparates pa presentar lo que ye la cultura sidrera y la cultura d’Asturies”, declaró n'An Oriant Aitor García Corte, alcalde de Bimenes. Él y otros cuatro primeros ediles de la Mancomunidá ‘Comarca de la Sidra’ desplazáronse a Breizh pa presentar nel Festival Interceltique de Lorient la candidatura ‘Cultura Sidrera Asturiana’ a Patrimoniu Cultural Inmaterial.

“Tamos equí cinco de los seis alcaldes de la mancomunidá, falta Alejandro –el de Villaviciosa–, que nun pudo venir por problemes d’axenda, pero venimos una bona representación a sofitar la candidatura de la cultura sidrera a Patrimoniu Inmaterial de la UNESCO”, esplicaba’l yerbatu a Asturies.com n’An Oriant frente al chigre instaláu pol Gobiernu en collaboración cola Conseyu Regulador de la Denominación d’Orixe Protexida (DOP) Sidra d’Asturies y l’Asociación de Escanciadores de Sidra. Nél los visitantes a la zona asturiana del Interceltique podíen consumir sidra de la DOP de Quelo, primer premiu del Festival de la Sidra de Nava d’esti añu, y Prau Monga, la DOP de Viuda de Angelón, pa lo que se desplazaron 550 caxes, amás de diferentes productos del llagar navetu.

García Corte rescamplaba lo llamadora que resulta la sidra pa bretones y persones procedentes d’otros países al servise “d’una manera peculiar, única nel mundu” y que tolo qu’arrodia al tema sidreru “ye mui importante pa nós”. “Tamos trabayando pol sostenimientu d’una cultura y una identidá como ye l’asturiana, y creemos que vamos consiguilo. Yera perimportante presentalo nesti LI Festival de Lorient, qu’esti añu tien a Asturies como país invitáu. Ésti ye un de los meyores escaparates pa presentar lo que ye la cultura sidrera y la cultura d’Asturies”, aseguró.

Sobre’l retrasu d’un añu na valoración por parte de la UNESCO de la candidatura al haber un tope y tener prioridá les d’aquellos territorios que cuenten con menos elementos yá reconocíos como Patrimoniu Cultural Inmaterial, apuntó que “estes coses pasen, pero siguimos cola mesma fuercia, lluchando y puxando por ello”. Por último calcó na importancia d’un festival nel que, “al rodiu de la música y la cultura, muévense munchos intereses económicos. Esto ye bono p’Asturies. Nun olvidemos que per esti festival pasen cuasi un millón de persones, presentamos Asturies al mundu y ye un escaparate ideal pa danos a conocer, polo que creo mui importante el sofitu de les alministraciones al mesmu”.

Na semeya, los alcaldes García Corte (Bimenes), Gerardo Fabián (Cabranes), Sandra Cuesta (Colunga), Saúl Bastián (Sariegu) y Juan Cañal (Nava) con un culín na mano frente al chigre d'Asturies nel Festival Interceltique de Lorient.