La Casa de las Lenguas de la Universidá d'Uviéu yá inclúi l'asturianu na so ufierta pa esti cursu

Va impartise n'Uviéu, en multinivel A1-B2, con matrícula abierta del 1 al 30 de setiembre.

Selmanes enantes del entamu d'esi mes, pa cuando l'equipu rectoral de la Universidá d'Uviéu anunciara la convocatoria del cursu d'asturianu dientro la ufierta de la Casa de las Lenguas de la institución, esti idioma yá s'incluyó nel llistáu de 15 que s'imparten esti añu xunto col castellanu pa estudiantes estranxeros. Les clases van tener llugar los llunes y miércoles n'horariu de 18.30 a 20 hores, con llibru de testu y unidaes entovía por confirmar.

El cursu va principiar el 17 d'ochobre, con final previstu en mayu, y la matrícula va poder formalizase a lo llargo de setiembre. Hai 25 places llibres y el costu pal alumnáu ye de 280 euros, que recibirá un Certificáu d'Aprovechamientu si acude al 85 por cientu de les 75 hores llectives y supera l'esame final.

Ausente na primer convocatoria

Esta convocatoria llega depués de la denuncia pública fecha pola Xunta pola Defensa de la Llingua Asturiana al tar l'asturianu ausente na primera, na qu'apaecíen los 14 idiomes restantes. La razón alegada dende l'equipu rectoral yera la falta de profesoráu pola decisión del anterior maestru de nun siguir esti cursu, según pudo saber darréu Iniciativa pol Asturianu, cola previsión d'anunciar la matrícula nel momentu d'atopar un sustitutu, cuestión que se solucionó enantes del tiempu previstu nun primer momentu, con setiembre nel horizonte.