El poemariu ‘Los carreros del tiempu’ da a Marta Mori el so segundu Premiu Xuan María Acebal

El XXVIII Premiu Xuan María Acebal de poesía, la categoría a la que se presentaron más trabayos de tolos Premios Lliterarios, foi pa ‘Los carreros del tiempu’ de Marta Mori. L’autora xixonesa yá llevara esti prestixosu gallardón nel añu 2010 col poemariu ‘La mio voz’.

“La claridá, la elegancia, l'equilibriu ente lo clásico y la contemporaneidá, la sensibilidá social nada impostada y la naturalidá llingüística” foi lo que convenció al xuráu, que rescampló’l nivel de les 13 creaciones que tuvo que valorar nesta edición, que cuenta con una recompensa de 6.000 euros. Antón García, direutor xeneral de Política Llingüística, presidiólu, con Laura Marcos, filóloga de la direición xeneral, como secretaria, y les tamién filólogues Marina Pangua y Iris Quintana, la poeta Elvira Laruelo y los poetes Rodrigo Olay y Pablo Texón –ganador l’añu pasáu con ‘Cantar de ti mesma’– como miembros del mesmu.

Nacida en Xixón nel añu 1965, onde exerce como profesora nel IES Xovellanos, además de na Universidá d’Uviéu, Mori ye doctora en Filoloxía Española. Vicepresidenta de l’Academia de la Llingua Asturiana y direutora de la revista ‘Lliteratura’ de la institución, ganó dos vegaes el Teorodo Cuesta, con ‘Pórticu’ (2002) y ‘El tiempu de la espera’ (2007), agora suma’l so segundu Xuan María Acebal con ‘Los carreros del tiempu’ depués de que nel 2010 lo fixera con ‘La mio voz’, y tien espublizáu’l llibru de rellatos ‘Histories familiares’ (2008), el poemariu ‘Orfandá’ (2019) y una traducción de Paul Valéry, ‘El cementeriu marín’ (2018).

Na semeya, Mori con un exemplar de 'Histories familiares' nes manes.