El ministeriu acepta’l pidimientu d’Asturies y va permitir el control de poblaciones de llobos

El Plan de Xestión del Llobu d’Asturies va tener garantía xurídica, confirmó’l Ministeriu pa la Transición Ecolóxica y el Retu Demográficu ayeri al Gobiernu. “La previsión ye qu’a lo llargo d’esti mes se pueda aprobar el documentu téunicu qu’avale que podamos desendolcar un marcu nuevu pa facer controles cuando sía necesariu”, informó’l conseyeru Alejandro Calvo.

“Por fin disponemos d’un documentu, prietu sobre blancu, que nos dota de les garantíes xurídiques. Tendremos qu’avanzar téunicamente, vamos facelo de la mano de les organizaciones de productores, de los representantes de los ganaderos”, apuntó’l responsable de Mediu Rural y Cohesión Territorial depués del Conseyu de Gobiernu d’esta mañana. D’esta forma, el Gobiernu va poder “siguir desendolcando en tolos sos términos el Plan de Xestión del Llobu n’Asturies”.

“Esa necesidá de seguridá xurídica ye importante non sólo pa protexer a la nuesa ganadería estensiva, sinón tamién pa poder siguir xestionando la especie como vinimos faciendo per décades. Ye la meyor noticia que podemos treslladar al nuesu sector”, añadió Calvo. La previsión ye qu’esti mes tea’l documentu que desendolcará un programa nuevu “pa poder facer controles cuando sía necesario con toles garantíes y en base al marcu de la direutiva europea”.

D’esta forma’l ministeriu acepta la propuesta pa incorporar al plan estatal de xestión fecha por Asturies, que xunto a Galicia, Cantabria y Castilla y Lleón trabayaron en comuña pa dar respuesta a la inclusión del llobu nel Llistáu d’Especies Xabaces en Réxime de Proteición Especial (LEXPRE), polo que la especie dexaba de ser cinexética, depués d’una votación ente les autonomíes y el ministeriu. Estes cuatro comunidaes son les qu’acueyen a les mayores poblaciones del mamíferu nel Estáu.

Na imaxe, Calvo. Semeya obra d'Armando Álvarez.