Selmana de les Lletres Asturianes

El Gobiernu refuga la decisión de prohibir la caza del llobu en tol Estáu

|
David Villar, Alejandro Calvo y Nino Rodríguez llobu

Asturies, Galicia, Castilla y Lleón, y Cantabria xúnense contra l'alcuerdu adoptáu na Comisión Estatal de Patrimoniu Natural y de la Biodiversidá col votu del ministeriu.

Tres una primer votación telemática con empate a 7 votos, 3 astenciones y dos comunidaes que nun quixieron participar y, una segunda con otru empate, esta vegada a 8, el representante de Transición Ecolóxica decidió la inclusión del llobu nel Llistáu d'Especies en Réxime de Proteición Especial (LESPRE). D'esta forma, esta especie dexa de ser cinexética tamién al norte del Duero, polo que nun se podrá cazar pa controlar la so población como se venía faciendo n'Asturies.

A les cuatro autonomíes qu'axunten el 95 por cientu de la población d'esti mamíferu sumáronse Euskadi, Andalucía, Comunidad de Madrid y Murcia, mientres que Navarra solicitó que la decisión se pospunxera pa buscar el consensu necesario y refugó participar na votación, al igual que la Comunitat Valenciana, y Ceuta nun pudo facelo por mala comunicación. La ministra Teresa Ribera deberá agora emitir una orde qu'incluya al llobu nel LESPRE, anque los territorios qu'acueyen a la inmensa mayoría de la so población van mover ficha.

Esta mañana aconceyaron los conseyeros de manera telemática, alcuentru nel que s'alcordado unes llinies de trabayu y midíes pa defender la sos posición, que pasa por garantizar la convivencia del llobu cola ganadería estensiva. "Creemos claramente que tebemos xestionar esta situación y vamos a defender con toles fuercies la competencia", apuntó Alejandro Calvo, responsable de Mediu Rural y Cohesión Territorial.

Nesi sen, considera que "nes comunidaes onde se xestionó'l llobu en nengún casu ta en peligru, namái hai que ver la espansión que tuvo, y menguar esa capacidá de xestión ye una irresponsabilidá y asina lo tamos tresllando a tolos niveles. Amás tenemos series duldes xurídiques con cómo se produnxo l'aconceyamientu d'ayeri".

Crítiques de Foro

El secretariu xeneral de Foro y voceru parllamentariu, Adrián Pumares, señala al respeuto la inclusión del llobu nel LESPRE que "supón un nuevu despreciu del Gobiernu d'España a Asturies y pon de manifiestu la influencia nula de la FSA pa treslladar los problemes d'Asturies al Conseyu de Ministros". Apunta que pue llegar a invadir les competencies autonómiques y alvierte de que "esti ataque nuevu del Ministeriu pa la Transición Ecolóxica a la nuesa tierra al que pon en peligru ye al mundu rural y a los sos habitantes, dificultando entá más la xestión de les ganaderíes".

Na semeya, Calvo preside l'aconceyamientu telemáticu acompañáu de David Villar, direutor xeneral del Mediu Natural y Planificación Rural, a la so izquierda, y Nino Rodríguez, direutor xeneral de Ganadería y Sanidá Animal, a la derecha.

Contador Estadistiques