La Rede de Normalización Llingüística celebró en Xixón la xunta constitutiva

Un total de 21 representantes de conceyos que cuenten con Serviciu de Normalización Llingüística y de la Universidá d’Uviéu participaron esti xueves en Xixón na xunta constitutiva de la Rede de Normalización Llingüística. Esti primer alcuentru foi principalmente informativu y aprovechóse pa presentar un dossier d’actividaes 2019-2022.

La conseyera de Cultura, Política Llingüística y Turismu, Berta Piñán, presidió l’aconceyamientu en compañía d’Antón García, direutor xeneral de Política Llingüística. Una xunta pola que se constituyó esti instrumentu que naz pa “reforzar la coordinación ente l’Alministración autonómica y los conceyos pa promover l’usu del asturianu y del eonaviego nel so territoriu”.

La Rede de Normalización Llingüística “supón l’instrumentu llegal necesariu pa encalzar oficialmente la collaboración” ente les alministraciones. Un órganu llamáu a desendolcar “un papel fundamental na regulación territorial de la política llingüística, na creación de servicios normalizadores nuevos, nel caltenimientu de los que yá tán funcionando y na coordinación y desarrollu de l’actividad de toos ellos”.

Esti primer aconceyamientu sirvió pa constituyila formalmente y ofrecer información sobre les actividaes feches polos diferentes servicios de normalización lingüística a lo llargo d’esta llexislatura y sobre’l tipu de collaboración que se pue establecer ente’l Gobiernu y la Rede. Tamién se presentó un dossier d’actividaes 2019-2022 qu’esplica en qué consiste esti instrumentu nuevu y que recueye les iniciatives desendolcaes polos SNL nesta llexislatura.

Nesti tiempu tuvieron activos de siguío Cabu Peñes (Carreño y Gozón), Llangréu, Ḷḷena, Cangas del Narcea, Corvera, Grau-Candamu, Avilés, ‘Comarca de la Sidra’ (Nava, Cabranes, Bimenes, Villaviciosa, Colunga y Sariegu), Ozcos-Eo (A Veiga, Santalla d'Ozcos, Vilanova d'Ozcos,

Samartín d'Ozcos, Taramundi, San Tiso d'Abres y Castropol), Fundación Parque Histórico del Navia (Bual, Cuaña, Pezós, Eilao, Grandas de Salime, Tapia, El Franco, Villayón y Navia), Xixón y el de la Universidá d’Uviéu, mentes que Mieres, Castrillón, Samartín del Rei Aurelio y Llanera funcionaron per periodos. Cuasi la metá de los conceyos asturianos cuenten nesti momentu con unidaes alministratives que s'ocupen de la normalización de les llingües, dando serviciu a más de la metá de la población del país.

“La regulación de la Rede de Normalización Llingüística representa un pasu más nel compromisu del Gobiernu d’Asturies por dinamizar l’impulsu y la recuperación del nuesu patrimoniu llingüísticu”, apunten dende la conseyería. Hasta agora, y dende va munchos años, furrulaba una Rede de Normalización Llingüística nos Conceyos de manera non reglamentada como plataforma collaborativa de trabayu y comunicación interna ente'l personal téunicu de los servicios, polo qu’esti pasu sirve pa da-y oficialización y ameyorar "la cooperación económica, téunica y alministrativa pa desendolcar actividaes, crear servicios normalizadores nuevos o promover cursos formativos".

Conseyu de la Rede y Comisión Téunica

La estructura de la Rede de Normalización Llingüística articúlase nun Conseyu de la Rede con presidencia y vicepresidencia, que ocuparán, respeutivamente, les persones responsables de la conseyería y de la direición xeneral con competencies en materia de política llingüística, anguaño Piñán y García, y un númberu ilimitáu de vocalíes que permitirán contar con representantes de cada alministración pública o entidá que s’incorpore a esti órganu. Naide nun percibirá retribución nenguna pola so participación.

Tamién va crease una Comisión Téunica constituyida por personal téunicu de los respeutivos servicios y de l’Alministración autonómica. Ésta va encargase de facer estudios, proyeutos, actividaes, programes, planes y propuestes en materia de política llingüística, pa lo que va poder formar los grupos de trabayu que considere necesarios.

Na semeya, un momentu del aconceyamientu d'esta tarde, celebráu na sala de xuntes de la Llaboral.