La creación d’una comisión billateral col Gobiernu estatal, “un pasu alantre fundamental” n'opinión de Barbón

La primer xornada de trabayu d’Adrián Barbón en Madrid con cuatro ministros esti llunes sirvió al presidente p’arrancar dellos compromisos. El más destacáu pol socialista ye la creación d’una comisión billateral col Gobiernu estatal, entovía ensin fecha, anque tamién citó la instalación d’un centru sobre economía forestal en Tinéu o la confirmación de l’autorización definitiva pa la regasificadora d’El Musel.

Foron cuatro alcuentros en diferentes sedes ministeriales que se completen esta tarde con un quintu, el central pa Barbón, la visita a Raquel Sánchez Jiménez, ministra de Tresportes, Movilidá y Axenda Urbana. L’últimu de la xornada, el de Félix Bolaños, responsable de Presidencia, Rellaciones coles Cortes y Memoria Democrática, nel complexu de La Moncloa, supunxo pal llavianés algamar “un pasu alantre fundamental”.

Referíase a la creación d’una comisión billateral “de rellaciones del Gobiernu d’España y del Gobiernu d’Asturies, que creo que ye la primera vez na historia más allá de les comisiones que se suelen crear ad hoc pa la tresferencia de competencies que se crea. Sería una comisión política p’analizar les rellaciones y el marcu de collaboración entrambos gobiernos”. Próximamente daráse a conocer la fecha de la primer reunión de la mesma, que va tar formada pola ministra de Política Territorial, Isabel Rodríguez García, y el propiu Barbón, a la espera de concretarse el restu d’integrantes.

Amás de concretar esi "pasu alantre fundamental", apuntó qu’analizó xunto con Bolaños los datos d’execución de la inversión estatal, motivu que lu llevó a entamar estos alcuentros con ministros, “y apréciase un ameyoramientu nestos primeros meses del añu 2022 con respeuto a los mesmos meses del 2021”.

Central de Soutu y Alu Ibérica

Na ronda de contautos tamién incluyó’l Ministeriu d’Agricultura, Pesca y Alimentación, onde lu recibió Luis Planas; el Ministeriu d’Industria, Comerciu y Turismu, llugar nel que se vio con Reyes Maroto; y el de Transición Ecolóxica y Retu Demográficu, con Teresa Ribera a la cabeza. Ente los alcuerdos algamaos, Barbón anunció la instalación d’un centru estatal sobre economía forestal en Tinéu que supondrá una inversión de cuatro millones y también abordará’l trabayu de les Brigaes de Refuerzu en Quemes Forestales (BRIF, poles sos sigles en castellanu) y avances tanto na busca d’alternatives pal pieslle de la central térmica de Soutu como de la factoría d’Alu Ibérica n’Avilés, ensin entrar en detalles pa nun poner en riesgu los posibles proyeutos industriales.

Tamién presentó una contrapropuesta al borrador d’Estratexa del Llobu y analizó l’impautu de los fondos Nex Generation y de los diversos Proyeutos Estratéxicos pa la Recuperación y Tresformación Económica (PERTE) puestos en marcha yá pol Gobiernu central. Amás, la ministra Ribera confirmó que’l so departamentu va dar nos díes próximos l’autorización definitiva que permitirá a Enagás abrir la regasificadora d’El Musel.

Na semeya, Bolaños y Barbón enantes del aconceyamientu.