Castañón critica que la FSA “clausurara la reforma del Estatutu ensin la valentía de trayer un testu a la Xunta Xeneral pa discutilu”

Con motivu de la conmemoración esti miércoles del 25 de mayu, Sofía Fernández Castañón y Rafael Palacios aprovecharon la xornada pa “falar de soberanía y de polítiques p’Asturies”. La coordinadora autonómica de Podemos criticó que la FSA “clausurara la reforma del Estatutu ensin la valentía de trayer un testu a la Xunta Xeneral pa discutilu” y demandó “una mayor autonomía, un mayor autogobiernu”.

“Vamos a esixir al Gobiernu d’Asturies y a Adrián Barbón que fine’l so mandatu con dalgo más que grandes pallabres y que tweets que nos suenen bien, porque naide dulda de la defensa y l’amor sinceru que siente’l presidente d’Asturies por esta tierra, por esti país, pero como dicen les sufraxistes, nosotres queremos fechos, non pallabres; y si se diz de facer polítiques progresistes que traduzan esi arguyu innegabale nuna apuesta determinada pola soberanía y l’ameyoramientu de les condiciones materiales de la ciudadanía d’Asturies saben mui bien que nos alcontraran dispuestes a negociar y a lluchar”, espresó Castañón. “Nun damos por perdida la llexislatura”, añadió Palacios.

“Nun vamos arrenunciar a abrir la reforma del Estatutu nesta llexislatura”, siguió’l voceru parllamentariu. Nesi sen, apuntó que “nun se pue pretender fiar a los resultaos de les eleiciones del 2023 una reforma estatutaria que tien que reconocer derechos que nos corresponden a los asturianos y asturianes”.

Enantes Castañón criticara que la FSA “clausurara la reforma del Estatutu ensin la valentía de trayer un testu a la Xunta Xeneral”. “Ye una falta de respetu a la democracia y una cobardía. Onde hai que lluchar y defender les posiciones llexítimes de cada parte ye na Xunta Xeneral”, apuntó’l de Ciañu, que calificó l’actualización de la norma “un tema central pal futuru del nuesu país y lo que queda de llexislatura”.

Derechos sociales y bienestar

La defensa de los derechos sociales y el bienestar de los asturianos y asturianes va ser otra “prioridá y retu fundamental” pa Podemos no que queda de llexislatura. La Llei de Derechos LGTBI, l’accesu a prestaciones económicas de subsistencia, les ayudes al alquiler o les oportunidaes pa les fasteres occidental y oriental del país foron dalgunos de los temes que se tocaron na intervención.

“Apostamos por una Asturies soberana, con mayor autonomía y autogobiernu, que desendolque un Estatutu del sieglu XXI p’avanzar toles nueses potencialidaes, que sía valiente na so apuesta polo público, polos derechos humanos y pola xusticia social”, rescampló Castañón.