Barbón insiste na so posición de nun abordar la reforma del Estatutu ensin la “garantía de 27 votos”

Foi un comentariu breve nuna entruga de Podemos nel Plenu de la Xunta sobre la Llei Trans, pero Adrián Barbón quixo dexar claro a Rafael Palacios que “la posición inequívoca del Gobiernu” ye que “la reforma namái se pue abordar si hai garantía de 27 votos”. El presidente afirmó qu’esta postura caltiénla “una parte mui importante del asturianismu”.

Nes entrugues al presidente de la sesión d’ayeri, mientres desendolcaba la réplica a la respuesta del llavianés a la pregunta “¿qué va facer el Gobiernu d’Asturies pa garantizar los derechos humanos de les persones trans y del conxuntu de la comunidá LGTBI?”, Palacios apuntó, en llingua asturiana, que “nun pue volver a pasanos lo que desgraciadamente asocedió cola, hasta agora, y digo hasta agora, fallida reforma del Estatutu d’Autonomía, na que’l Gobiernu asturianu nun fixo nenguna sola propuesta concreta pese a qu’había, y sigue habiendo, tiempu abondo p’aprobala nesta Xunta Xeneral”. El de Ciañu referíase a una Llei Trans “que protexa a les persones trans y al conxuntu del coleutivu LGTBI”, norma cola que namái nun cuenten nel Estáu Asturies y Castilla y Lleón.

“Señor Palacios”, principió Barbón la so réplica en castellanu, “enantes d’entrar nel tema, si me permite una broma, cuando vusté dicía ‘sobra tiempu pa facer la reforma del Estatutu’, cierto, sobra tiempu, lo que falten son votos. Ye dicir hai 26 y necesítense 27, y yá sabe cuála ye la posición inequívoca del Gobiernu d’Asturies y, por cierto, d’una parte mui importante del asturianismu: que la reforma namái se pue abordar si hai garantía de 27 votos. Y como nun los hai, nun lo vamos facer”.

Podemos vien insistiendo en qu’entovía queda llexislatura pa entamar con una reforma del Estatutu qu’incluya la oficialidá del asturianu y del gallego-asturiano y criticando la postura de la FSA al nun llevar esti asuntu a la Xunta Xeneral. El Parllamentu ye’l llugar onde tamién considera la Xunta pola Defensa de la Llingua Asturiana (XDLA) ha tratase y votase esta cuestión pa saber si realmente hai o non esos 27 votos.

Últimos pasos pa la llei

Sobre la norma que se taba tratando, Barbón afirmó que “ye fundamental y importante”, y anunció que “tamos dando los últimos pasos pa unviar a esta Xunta Xeneral la nuesa llei de derechos y llibertaes del coleutivu LGTBI”. Nesi sen, apuntó que “lóxicamente los derechos trans son defendíos por esti Gobiernu, pero nosotros entendemos qu’Asturies lo que necesita ye una llei integral pa tol coleutivu LGTBI”.

Na imaxe, Barbón ayeri nel Plenu de la Xunta Xeneral. Semeya obra d'Armando Álvarez.