La modificación de los currículos educativos ye “deceicionante y poco ambiciosa” pa Iniciativa pol Asturianu

Una presencia digna de la Llingua Asturiana y el Gallego-asturiano nel enseñu “pa dar cumplimientu al mandatu de la Llei d’Usu”. Ye la demanda d’Inciativa pol Asturianu al Gobiernu, organización que considera “deceicionante y poco ambiciosa” la modificación de los currículos educativos anunciáu pola Conseyería d'Educación.

L’artículu diez de la norma aprobada nel 1998 “establez que ‘el Principáu d’Asturies ha garantizar l’enseñu del bable/asturianu en tolos niveles y graos’ y garantiza que los alumnos qu’escueyan el so aprendimientu tendrán de recibir ‘la mesma formación y conocimientos n’igualdá de condiciones que’l restu del alumnáu’”, recuerda esti coleutivu, que valora l’ampliación d’hores en Bachilleratu, pero considera insuficiente la presencia del asturianu en toles etapes educatives. Ye “deceicionante y poco ambiciosa”, concreta.

Iniciativa pol Asturianu reclama que la materia d’asturianu dientro de la formación educativa tenga una mayor continuidá y refuga los saltos d’hores dependiendo del cursu y la etapa. "Esto llograría dar estabilidá a l’asignatura y permitiría tamién un refuerzu nos propios conocimientos del alumnáu”, asegura.

Magar pasar de 1 hora a 3 selmanales en Bachilleratu, l'asignatura va siguir compitiendo con otres asignatures nesta etapa, al igual qu’en Secundaria, “contraviniendo l'espíritu de la citada llei”. Nel restu d'etapes educatives la presencia de l'asignatura nun ameyora, yá que pierde una hora nel cuartu cursu de Secundaria y caltién una insuficiente hora y media selmanal en Primaria, onde tamién ye optativa xunto con Cultura Asturiana.

La situación más llaceriosa dase n’Infantil, onde “nin siquiera se cita” l’asturianu nel proyeutu de currículu adaptáu a al LOMLOE que preparó la conseyería.

Campaña de matriculación

Sobre la campaña de matriculación, qu'entamó esta selmana cola emisión de siete pieces na radio y na televisión pública, Iniciativa pol Asturianu reflexa la necesidá de llevala en tiempu y forma a los centos educativos. La organización recuerda que yá treslladó en delles ocasiones esta demanda a la Direición Xeneral de Política Llingüística y a la propia conseyera d’Educación nel conceyu que caltuvieron el pasáu mes de febreru: "Nun ye de recibu publicar una campaña informativa con unes feches nes que yá tan cumplimentaes prácticamente toles matrícules feches", apunta en referencia a lo asocedío en cursos pasaos.

Na semeya, la conseyera Lydia Espina y David Artime, direutor xeneral d’Ordenación, Evaluación y Equidá Educativa, na presentación del proyeutu de currículos d'Infantil y Primaria'l 5 de mayu.