Aína entama’l so primer actu públicu, centráu nel Estatutu d’Autonomía

‘¿Falamos d’estatutos? ¿Falamos d’Asturies?’ ye’l nome del primer actu públicu d’Aína, l’espaciu políticu nuevu pensáu dende’l país y pal país. Va ser n’Uviéu, nel salón d’actos de la Facultá de Psicoloxía de la Universidá d'Uviéu, y va contar cola participación de Margarita Fernández Mier, Xosé Antón Fernández ‘Ambás’ y Tino Brugos.

L’estatutu que pudo tener Asturies, el significáu de la marca ‘Asturies’ n’actualidá depués de 40 años d’autonomía y les necesidaes y el futuru institucional del país, asina como l’estatus políticu que merez, son dalgunos de los temes que se van tocar nesti alderique que va suponer la presentación pública d’Aína. Los asistentes al eventu van poder conocer tamién más detalles sobre un proyeutu que ta xenerando interés dende los sos primeros pasos en redes sociales y que busca atropar xente pa consolidar el so oxetivu de crear y consolidar una estructura propia qu’ayude a tresformar Asturies dende’l diálogu “de tu a tu” con toles fuercies polítiques y en tolos espacios políticos.

Pa esta importante primer cita Áina convidó a participar a trés persones d'estremaos ámbitos sociales, dende l’universitariu al cultural, pasando pela sanidá pública o l’enseñu. Asina van participar Fernández Mier, doctora n’Historia pola Universidá d’Uviéu; Ambás, sanitariu, músicu y etnógrafu; y Brugos, profesor d’Historia y miembru de la Permanente del Sindicatu Unitariu Autonómu de Trabayadores de la Enseñanza d’Asturies (SUATEA).

L’alderique va tener llugar el xueves, a les 18 hores, nel salón d’actos de la Facultá de Psicoloxía. La entrada ye llibre pa tola xente interesao.