La XDLA llama a la movilización pola oficialidá pol Día de les Lletres Asturianes

La manifestación va celebrase'l sábadu al meudía n'Uviéu con salida na Estación del Norte (RENFE) y final na Escandalera.

La Xunta pola Defensa de la Llingua Asturiana (XDLA), depués del parón obligáu pol andanciu de COVID-19, recupera la manifestación pol Día de les Lletres Asturianes, anque va celebrase al día siguiente en cuenta del vienres, como ye vezu, enantes del actu académicu, que tuvo llugar pela mañana. L'añu pasáu entamara la formación d'una gran 'O' pola oficialidá na plaza la Catedral y nel 2020 nun se pudo convocar pola situación sanitaria.

La organización fai un llamáu "a tolos asturianos y asturianes pa que, como vienen faciendo dende hai 40 años, muestren l'apoyu a la igualdá de derechos llingüísticos ente tola ciudadanía y a un futuru dignu pal nuestru patrimoniu llingüísticu". P'animar a la movilización, estos díes ta moviéndose la campaña en redes #ElVasuDeLaOficialidá "pa que la xente ayude a promocionar la convocatoria sacando una semeya con un vasu, en referencia al cartel de la manifestación y la metáfora 'd'enllenar el vasu de la oficialidá ente toos'".

"La oficialidá namás ye'l reconocimientu llegal del derechu que tien cualquier persona a usar llibremente la llingua propia d'un territoriu. La oficialidá ye un avance democráticu porque amplía derechos y llibertaes ciudadanes. N'Asturies tenemos dos llingües propies, l'asturianu y el gallego-asturianu, y los sos falantes nun tienen reconocíu llegalmente esi derechu. Si les nuestres llingües son como les demás llingües del Estáu, ¿por qué los sos falantes tienen menos derechos que los falantes d'otres comunidaes? Queremos el mesmu tratu institucional y el mesmu réxime de protección que tienen les demás llingües del Estáu", demanda la XDLA, que considera que "nun ye ético tener más tiempu esta situación indigna pal nuestru patrimoniu cultural: si somos conscientes de la situación de desigualdá nun se pue esperar más. Hai que reformar l'Estatutu d'Autonomía p'aprobar la oficialidá y depués, con una Llei de Normalización, siguir un procesu adaptáu a la situación asturiana".

Llueu del percorríu ente la Estación del Norte, con salida a les 12 hores, y la Escandalera, la cantante Alicia Villanueva, l'escritor y músicu Xaime Martínez, la filóloga María Abril y el traductor Miguel Sánchez van encargase de lleer un manifiestu. El grupu folk Algaire va pesllar l'actu con un conciertín.

Na semeya, manifestación de la XDLA del XL Día de les Lletres Asturianes, nel 2019.