La demanda d’oficialidá sigue na cai: “el vasu ta abondo más qu’amediáu”

Miles de persones ocuparon la cai Uría d’Uviéu na manifestación de la Xunta pola de la Llingua Asturiana (XDLA) pol Día de les Lletres Asturianes, que cambió esti añu l’habitual horariu vespertín del vienres a la xornada siguiente a la celebración pela mañana. “El vasu ta abondo más qu’amediáu” espresó la organización nun manifiestu que, como novedá, lleeron na Escandalera cuatro persones.

En concreto dixo esa afirmación el traductor Miguel Sánchez, al que siguió la cantante Alicia Villanueva apuntando que “sí, vese un vasu bien enllenu de razones, de sentimientos, de derechos, de xente de tolos colores comprometío cola llingua y cola llucha… De música, de banderes, de corazones, de lliteratura, d’esperanza, de munchu arte… Un vasu que ta al tresvertir de dignidá y de voces que glayen ¡oficialidá, yá!”. Foi na plaza de la Escandalera, llugar escoyíu pa terminar llueu de 2 años de parón, la movilización pol Día de les Lletres Asturianes de la XDLA, a pocos metros del Campoamor, tradicional final minutos previos al actu académicu, celebráu nesta ocasión pela mañana nel Teatru Filarmónica.

Los manifestantes siguieron la ruta habitual, enllenando de color y reivindicación polos derechos llingüísticos de los falantes d’asturianu y gallego-asturiano la cai Uría. Diferentes asociaciones, coleutivos, sindicatos y partíos políticos sofitaron la convocatoria, acudiendo con pancarta ‘Reciella. Families pol Asturianu’, el Sindicatu Unitariu Autónomu de Trabayadores de la Enseñanza d’Asturies (SUATEA), Andecha Astur, Comisiones Obreres (CC OO), Mazcaritos d’Uviéu, #LluchandoPolaSoberanía, Darréu, Mocedá Comunista, Podemos y Iniciativa pol Asturianu, mientres que tamién se dexaron ver banderes de la Corriente Sindical d’Izquierda (CSI).

Incumplimientu de la promesa de llevar l’alderique al Plenu de la Xunta Xeneral

“Si nesta llexislatura nun se llogró la oficialidá del asturianu y del gallego-asturianu nun foi por falta de puxu de la xente que tais equí. Les mayores demostraciones de la vitalidá y la fuercia del movimientu viéronse dende que s’abrió la posibilidá de llograr un avance históricu pa les llingües propies d’Asturies. Y güei volvemos tar equí cola certeza de que la razón ta del nuestru llau”, rescampló la filóloga María Abril.

La XDLA insiste con que “nun s’abrió’l debate onde se tenía qu’abrir: nel Plenu de la Xunta Xeneral. Y eso ye responsabilidá del Conseyu de Gobiernu, el Gobiernu de la FSA, que ye l’unicu órganu que tien agora mesmo la capacidá d’impulsar una reforma del Estatutu d’Autonomía”.

Nesti puntu l'escritor y músicu Xaime Martínez recordó la promesa númberu 186 del programa socialista a les eleiciones nacionales del 2019: “compromisu esplícitu d’abordar, nesta llexislatura, el debate sobre la reforma del estatutu y del reconocimientu oficial del asturianu y del gallego-asturianu”. “¿Qué pensáis que diba salir d’esi debate? ¿Nun diba haber una mayoría de diputaes y diputaos p’aprobar un estatutu al altor d’esti país, de la so xente, de la so cultura, d’una vez por toes? ¿O pensáis que diba ganar la postura d’esa minoría radical y intolerante qu’apuesta abiertamente pol esterminiu de les llingues propies d’Asturies?”, entrugó.

Pasos atrás na normalización

La organización tamién alviritió de “pasos atrás na normalización, perdiéndose espacios d’usu del asturianu que yá paecíen afitaos y reconocíos por tola comunidá. Porque una Cátedra de Lliteratura Asturiana o trabayar p'algamar el Maior d'asturianu nun podemos negar que son pasos alantre, pero la realidá ye que la selmana pasada'l rector de la Universidá d’Uviéu anunció que diben dexar d’usar l’asturianu institucionalmente, contraviniendo l’Estatutu d’Autonomía y los propios estatutos de la universidá. Y, lo que ye más grave, col silenciu o la complicidá del Gobiernu”.

La falta de programación infantil n’asturianu en TPA, l’ausencia del idioma al nun ser oficial nes diferentes plataformes audiovisuales cola Llei Audiovisual nueva, la situación tanto del profesoráu pola negativa a crear la especialidá docente como de l’asignatura nel sistema educativu al nun ameyorar cola LOMLOE o la falta d’usu de la toponimia oficial foron asuntos recordaos nel manifiestu. “Hai que reconocer los derechos llingüísticos de los asturianos y asturianes porque siguen tando inoraos y violentaos. Hai que protexer el nuestru patrimoniu llingüísticu pa que dexe de tar arrequexáu y abandonáu al so desaniciu.¡Nin un día más con un derechu menos!”, esclamó Martínez.

“Mientres el debate nun s’abra en condiciones, el conflictu va siguir zarráu en falso. De momentu paez que les fuercies polítiques yá asumieron que nun va haber oficialidá anguaño, dalgunes entregándose yá a cálculos electoralistes perriba de les obligaciones que-y deben al electoráu”, criticó Villanueva.

"Va llegar de xuru"

Lo que ta claro ye que la oficialidá “va llegar de xuru, porque’l futuru pal asturianu y pal gallego-asturianu namás va ser posible con oficialidá y porque ye la voluntá d’un pueblu. Nunca hubo na Xunta Xeneral tantos grupos políticos a favor, así que les condiciones tán ehí y hai que les aprovechar. Equí van alcontranos pa dicilo toles veces que faiga falta: ¡l’asturianu, llingua oficial!”, finó’l manifiestu.

Porque la oficialidá “va poner les bases xurídiquespa facilitar que s’estienda l’usu de la llingua a toles situaciones sociales, va favorecer el desenvolvimientu d’una industria cultural propia d’Asturies y ayudar a la tresmisión xeneracional. Y, sobre too, va impedir la represión por razones llingüístiques que yá tamos careciendo y de la que yá tamos fartes”.

Na semeya, un momentu de la llectura del manifiestu colos asistentes dexando pequeña la Escandalera.