“Somos un partíu asturianista”, diz Barbón

La oficialidá nun se cuestionó demientres el congresu socialista.

Nel Congresu de la Federación Socialista, que se cellebró n’Uviéu esti fin de selmana, quedó claro que’l PSOE asturianu va siguir defendiendo la oficialidá del asturianu y del eonaviegu, compromisu qu’afitó fai yá cinco años. Pal presidente d’Asturies, “ye un proyectu reforzáu”. Na so intervención, el presidente dixera tamién: “Sorprende que diga que somos un partíu asturianista. Sómoslo. Llevamos el nome d’Asturies dende fai 120 años, la historia d’Asturies ta venceyada a la de la FSA y la FSA a la d’Asturies ¿Qué otru partíu pue dicir que ye asturianista?”.

Adrián Barbón quisó recalcar “Que nun confundan, somos defensores d’una identidá integradora, constructiva, pero que reivindica Asturies con arguyu, que nun s’arrepiente y que nun s’avergoña”. Anque quixo dexar claro que ser asturianu "ye la nuestra forma de ser español, européu y ciudadanu del mundu".

Nes comisiones les resoluciones tuvieron clares, “nun se punxo en cuestión la oficialidá pa nada” declaró un militante participante nel congresu, “nun hebo tensión, nun hebo nengún problema. Ye más, quedó afitáo pa llevalo nel programa de les próximes eleiciones autonómiques”. Quixo responder asina, a lo publicao na prensa asturiana.

Una de les enmiendes presentaes plantegaba la posibilidá de disponer d’un canal pa la emisión de la TPA n’asturianu, manteniendo l’actual en castellanu. Nun s’aprobó, pero según fontes de la FSA, l’argumentu ye que “eso va dir de forma progresiva, igual que la oficialidá”. Nel últimu congresu socialista, cellebráu en 2017, el tema de la llingua asturiana tuvo tamién presente. Calca equí pa lleelo.