Educación anuncia que va reforzar l’enseñu de la cultura asturiana n’Infantil

Díes depués del anunciu de la conseyera Lydia Espina de l’ausencia del asturianu n’Infantil, Educación comunica la so intención de reforzar l’enseñu de la cultura asturiana n’elementos tresversales en dos de les trés árees nel que se va estremar’l currículu. “La idea esencial consiste en tresmitir al alumnáu dende edaes tempranes conteníos de sensibilización del entornu escolar”, apunten.

En nengún momentu cita a la llingua asturiana, centrándose en falar de “la cultura y la tradición asturianes”, anque habría conteníos nel idioma nes árees que traten les cuestiones llingüístiques y el conocimientu del mediu. Son ‘Descubrir, disfrutar y esplorar l’entornu’ y ‘Comunicar y representar la realidá’, a les que completaríen una tercera, ‘Medrar n’harmonía’, nel currículu d’Infantil nuevu nel que ta trabayando Educación p’adaptalu a LOMLOE.

Espina esplica que se trata de tomar como referencia la realidá que vive l’alumnáu y rescampla “la importancia de la educación n’edaes tempranes pal desenvolvimientu de les capacidaes de la persona”. Pa esta etapa tamién s’opta por potenciar el deprendimientu d’nglés, cola so implantación pela primer vez pal alumnáu de trés años, de forma lúdica y comunicativa.

Posibilidá d’ampliar les hores en Bachilleratu

Iniciativa pol Asturianu aconceyó esta mañana, 48 hores después del comunicáu d’Educación, cola conseyera y col direutor xeneral d’Ordenación, Evaluación y Equidá Educativa, David Artime. Inaciu Galán y el secretariu téunicu Xuan Pandiella treslladaron demandes, midíes y propuestes pa la presencia del asturianu y el gallego-asturiano nos centros escolares, insistiendo na necesidá de buscar un encaxe a les llingües propies n’Infantil: “Ye especialmente importante la presencia de la materia nesta etapa pa caltener l’idioma que los y les neñes sienten en casa y p’afitar la matriculación na asignatura na etapa de Primaria”.

La organización atopó “receptividá” pa toles cuestiones trataes, rescamplando la posibilidá d’ampliar la carga llectiva en Bachilleratu, agora d’una hora selmana cuando llegó haber cuatro nel pasáu, y el compromisu per parte de la conseyería del usu de la toponimia oficial. Por contra, ve más difícil la posibilidá de desbloquiar la creación de la especialidá docente énte la falta de la oficialidá y la negativa rotunda del ministeriu de modificar los reales decretos.

“Ésta ye una decisión política y tamos nuna situación ilóxica na que tolos responsables (Ministeriu d’Educación, Conseyería d’Educación, Xunta Xeneral…) tán d’alcuerdu pero nun son quien a buscar una igua definitiva pa esta cuestión. Ye clave ameyorar la situación del profesoráu, como nos treslladaron los sindicatos del ámbitu de la educación, colos qu'aconceyemos va unos díes”, esplicó Galan, vocal de Rellaciones Institucionales d’Iniciativa pol Asturianu.

Plan Pilotu

Na xunta tamién se propunxo repetir la esperiencia del Plan Pilotu pa facer l’asturianu llingua vehicular nuna asignatura “que funcionó mui bien, participando hasta 10 centros educativos y a costu cero”, solicitóse la ufierta de la materia nel Bachilleratu a distancia y la inclusión d’una prueba del idioma na EBAU, l’ampliación de les places del máster del profesoráu d’Educación Secundaria que pon la Universidá d’Uviéu pola alta demanda y delles iniciatives como l’usu normal del asturianu en diferentes actos per parte de la conseyera y la renovación progresiva de la cartelería nos centros educativos pa que'l paisaxe llingüísticu de los centros tea tamién n'asturianu. D’igual forma, reclamóse mayor celeridá na campaña de matriculación de Llingua Asturiana y Gallego-asturiano pa llegar a tiempu al procesu de prematrícula.

El balance del alcuentru, resume Iniciativa pol Asturianu, “ye positivu” no que cinca a l'actitú de la conseyera, “pero d'escepticismu pola falta d'acción nestos meses y pol pocu tiempu de llexislatura que queda”. “Ye necesario demostrar con fechos que signifiquen avances reales, les bones pallabres d'esti Gobiernu pa col asturianu. Ye bien positivu'l cambiu d'actitú frente a executivos anteriores, pero ye necesario que cristalice en fechos que supongan una diferencia significativa pa la presencia del idioma nel sistema educativu. El marcu llegal actual permite dar munchos pasos alantre que permitan preparanos pa la oficialidá”, aseguró Galán.

Na semeya, Galán, Pandiella, Artime y Espina.