Asturies.com: 25 años

 Asturies.com fai esti mes 25 años de vida, 25 años d’un proyeutu que nació pa poner Asturies nel mapa d’un mundu que nacía daquella, la rede Internet, y col que pretendíemos normalizar y dignificar l’asturianu nun soporte de comunicación, una ferramienta nueva, que taba llamada a condicionar el futuru de la humanidá y la forma que tenemos de rellacionanos. 

En 1997 nengún de los medios impresos en castellanu que coparen hasta esi momentu l’espaciu mediáticu nel país teníen presencia online, y diben tardar años en tenela, les primeres iniciatives qu'usaben l'asturianu na rede, como Espaciu y Tiempu, o'l selmanariu impresu 'Les Noticies' taben acabante ponese en marcha, y a la RTPA faltába-y cuasi una década pa echar a andar.

Asturies.com marcó asina cola so salida el principiu d'un proyeutu de prensa dixital n’asturianu que se caltuvo en llinia de manera ininterrumpida nesti cuartu de sieglu nel que convivió con otres iniciatives y proyeutos que se mandaron del asturianu y col que se foi arriqueciendo'l panorama de la prensa dixital asturiana.

Yera un momentu, la fin del sieglu XX,  nel qu’había delles semeyances col que tamos viviendo anguaño, un momentu d’esperanza, nel que se discutía una reforma del Estatutu d’Autonomía onde la oficialidá del asturianu paecía posible, al que siguió un periodu de frustración que nun nos fixo danos en nengún momentu, porque Asturies.com yera y ye un proyeutu comprometíu con una visión d’Asturies moderna y arguyosa del so pasáu pero que mira siempre pal futuru con optimismu.

Asina entamamos

A lo primero de febreru del 1997 dábase anuncia na canal d’Internet soc.culture.asturies del nacimientu d’Asturia, la comunidá asturiana (http://asturies.com) na rede, una iniciativa de dos ventiañeros, Fernando de la Fuente y David Guardado, qu’al pocu tiempu entamó a nomase col so dominiu, Asturies.com. 

Daquella los oxetivos yeren ufiertar un proyeutu de comunicación que sirviere de carta de presentación pal nuesu pais y la nuestra llingua, con enfotu normalizador y voluntá informativa y divulgadora, procurando siempre enanchar los campos d’usu del idioma y xuntando a los asturianos y asturianes que diben accediendo dende tolos llugares del mundu a una ventana que diba abriendo y que sirvió pa que mucha de la xente emigrao o descendiente d'asturianos tuviere un contactu muncho más directu cola so tierra d'orixe. 

El nuesu enfotu yera dar una visión asturiana de l’actualidá, y ser voceros d’otres manifestaciones de la cultura asturiana, d’unes visiones d’Asturies marxinaes o silenciaes nos  medios que calteníen un plantegamientu subsidiariu de la nuestra realidá, que nun yeren quien a ver el potencial de desarrollu y autoestima que tien l’usu de la llingua propia pa una sociedá como la nuesa.

Nesti cuartu de sieglu que llevamos andaos, pasaren per Asturies.com decenes de persones que trabayaron o collaboraron pa caltener el proyeutu faciendo conteníos, nel departamentu de tecnoloxía, que trabayaron nel diseñu o na estratexa comercial. Dalgunes d’elles son referentes anguaño nel campu de la comunicación, de la lliteratura o del ensayu n’asturianu, otres llevaron les sos carreres profesionales a otros ámbitos, pero a toes elles támos-yos fondamente agradecíos pol so compromisu y la so ayuda y por ser parte de la historia d'esti mediu.

También tenemos abondo qu’agradece-yos a les empreses y les instituciones que nos sofitaron, y sofiten, porque creyíen na necesidá de la existencia d’un mediu n’asturianu, y lo más importante, a tolos llectores qu’acceden a la nuestra web o nos siguen nes redes sociales y que son quien da sentíu a estos 25 años de trabayu.

El futuru

Los oxetivos colos qu’echamos a andar esti proyeutu nel 1997 siguen presentes y pueden resumise nún: que la comunidá asturiano-falante en concreto y Asturies nel so conxuntu, cuente con un mediu de comunicación n’asturianu referencial.

Güei, Asturies.com ye un mediu consolidáu, pero somos sabedores de que’l mundu ye cambiante y los llectores demanden y merecen que nos adaptemos a los cambeos de consumu y formatos, y que podamos dar la calidá y variedá nos conteníos necesaries pa ser un mediu que cumpla l'oxetivu, ambiciosu, que nos propunxéramos dende la fundación.

Sabemos que nun ye fácil y que nesti momentu queda muncho por andar y abondo que meyorar, polo que queremos aprovechar la efeméride pa dar un pasu alantre y entamar una nueva etapa.

Asina, a lo llargo d’esti 2022,  vamos dir anovando’l proyectu col envís d’ufrir esi mediu de comunicación que la sociedá asturiana y el tiempu que vivimos precisa y demanda: un mediu de calidá, caltenible economicamente y n’asturianu.

A quien nos lleváis siguiendo estos 25 años pidímosvos que sigáis sofitándonos, apurriéndonos idees, opiniones, collaborando, y sobre manera, lleéndonos, pero queremos tamién facer una llamada a les nueves xeneraciones de llectores que comparten la nuesa visión pa que nos ayuden a construyir l’Asturies.com del futuru.

Colos que tuvieron y colos que van venir esperamos siguir polo menos otros 25 años xuntos.